Evelyn Wever-Croes (MEP): Aruba ta den shock p’e tragedia di diamars na Boegoeroei

Palabra di condolencia na famianan di e victima

 

Lider di MEP Evelyn Wever-Croes atrabes di un grabacion, a manda palabranan di condolencia y convivencia p’e famianan di e victimanan di e tragedia diamars ultimo na Boegoeroei.

“Mi palabra di condolencia y convivencia ta bay na famianan di e victimanan. Mi ta spera cu Dios por duna nan forsa den e temponan dificil aki, y cu e victimanan sosega na pas.

Mi pensamento tambe ta bay na demas agentenan policial envolvi, y mi ta desea nan forsa den e temponan dificil aki.

 

Mi ta extende palabranan di condolencia y convivencia tambe na henter Cuerpo Policial, pasobra un agente policial cu perde su bida na pia di trabou ta un sla duro pa henter Cuerpo.

Cu Dios duna boso forsa, y duna mando policial forsa y sabiduria pa guia e Cuerpo den e temponan dificil aki.

Aruba ta pasando den momentonan dificil pa loke ta criminalidad, y nos mester di un Cuerpo fuerte pa combati criminalidad cu man duro.

 

E tragedia a pone mi para keto tambe n’e estado di cuido di salud mental na Aruba. Nos no tin un cuido di salud mental adecua na Aruba, y eynan nos a faya.

E problema di salud mental y di esnan cu tin problema di salud mental y di abuso di droga, ta serio na Aruba, y tin hopi famia destrosa.

Famianan cu ta busca ayudo y cuido pa nan ser keri, pero no ta haya.

 

Nos sa di mas cuidadano cu mester haya cuido di salud mental, pero no ta haya e cuido adecua. Nos ta di cuidadanonan cu mester wordo interna, pero aki na Aruba nos no tin un instituto pa interna.

Esaki no t’e momento pa punta dede ken tin culpa of laga. Ban usa e momento aki pa uni den nos compromiso pa algo asina no sosode nunca mas.

Nos compromiso ta pa brinda cuido di salud mental, e lugar cu e mester. Y brinda un cuido di salud mental digno na Aruba y pa construi un instituto pa interna esnan cu mester di cuido mas intensivo.

 

Nos compromiso ta pa brinda Cuerpo Policial mas personal y material pa nan por eherece nan trabounan mas mihor, y pa protehe nan mes.

Asina so nos por percura cu locual a sosode dialuna, no pasa nunca mas. Cu Dios duna famianan di victimanan forsa, y cu e victimanan sosega na pas”, tabata palabranan di lider di MEP Evelyn Wever-Croes.

 

 

Top