Evelyn Wever-Croes (MEP):  Ban cuida nos medio ambiente di berdad! No cu palabra so!

Den siman ta hopi hende a haya un susto ora a mira e destruccion di naturalesa na Dakota, pa e construccion di e Watty Vos Boulevard. Esaki a pasa sin anuncia, y obviamente sin un bon planificacion.
Den nomber di Gabinete Mike Eman a cap hopi mata sumamente valioso pa nos naturalsa, cu ta eynan di hopi aña. Berdad nan no por a pensa un forma pa no destrui nos naturalesa?
Despues a core anuncia cu lo remplasa nan. Tur hende sa cu e matanan ey bo no por remplasa nunca mas, sra. Wever-Croes ta splica.

VISION GREEN
Pero mas tristo, segun sra. Wever-Croes, ta cu ta hustamente e Gobierno aki ta pretende di tin un vision “green”. Pero realmente kico e Gobierno aki a haci pa nos medio ambiente? Net net nada.
Solamente palabranan bunita, pero di accion, net net nada.

FALTA DI ORGANISACION
Otro cos cu ta causa hopi iritacion ta cu e Gobierno aki ta haci tur cos bruha, nan falta organisacion. Dicon no por caba cu un proyecto prome cu cuminsa cu otro?
E molester cu e vierbaansweg ta causando na Pos Chikito y Savaneta, ta enorme. E trabounan ey ta leu di keda cla, anto awor ya caba ta bay cuminsa cu otro proyecto?

SOLUCION REAL, NO PALABRA BUNITA SO
Nos medio ambiente mester di atencion real, no solamente bunita palabra. P’esey MEP ta pone prioridad na e ley di medio ambiente, Sin e ley di medio ambiente, ta manera carga awa hiba lama, bo no por proteh’e nos naturalesa. Si e ley aki lo tabat’ey, e destruccion di Rooi Frances, e destruccion di mangrovenan di Spaans Lagoen ni e destruccion den Dakota lo por a pasa sin consecuencia. E ley aki lo haya prioridad bou di un Gobierno di MEP, sra. Wever-Croes a declara.

“Den e ultimo añanan nos a mira mas tanto inversion den proyecto di infrastructura grandi, mientras e camindanan den barionan mes a wordo neglisha. Locual ta mas tristo, e ser humano tambe a wordo lubida. Ningun pais por progresa si bo neglisha su hendenan.
P’esey MEP lo trece un balance den e inversion den infrastructura, y den e ser humano.
E ser humano lo haya prioridad, y e infrastructura den barionan lo haya prioridad”, tabata palabranan di Evelyn Wever-Croes, lider di MEP.

Leave a Reply

Top