Evelyn Wever-Croes (MEP): Ban trece orden y respet bek na Aruba

“Unda cu bo bay den e ultimo dianan aki, bo ta ripara cu den nos comunidad tin un desapunto y desanimo. Hendenan ta sclama pa nos bin bek cu orden y respet. Cuminsando den husticia pa asina trece bek trankilidad y seguridad. Hopi hende no ta compronde con Aruba por a bira asina insigur den asina poco tempo.

 

Bishitando cas pa cas den e dianan aki nos ta hiba e mensahe di speransa den cada hogar, e speransa cu e cambio ta na caminda y cu nos lo trece bek orden y respet den nos pais.

Pasobra ta obvio cu e Gobierno aki no por mas. Ta obvio cu e Gobierno no kier mas.

Ta obvio cu ta e cambio mester bin despues di eleccion 2017, e cambio di rumbo di nos pais pa haci nos pais sigur atrobe”, segun Evelyn Wever-Croes.

 

CON MEP LO HASI ARUBA MAS SIGUR?

“Un pregunta cu nos ta haya casi tur dia ta “con MEP ta bay haci Aruba mas sigur bek”.

E problemanan di nos pais ta serio, sinembargo nan no ta imposibel pa soluciona.

Bo mester tin vision unda bo ta bay, determinacion pa yega eynan y curashi pa hala tur cos for di bo caminda.

 

Bo mester tin un vision cla: un Aruba sigur atrobe. Bo mester tin determinacion pa yega eynan y no laga nada desvia bo atencion di bo prioridad cu ta combati criminalidad. Y bo mester tin curashi pa combati criminalidad cu man duro, sin miedo. Algo dificil naturalmente pa un Gobierno cu ta asina amigo di criminalnan”, lider di MEP a splica.

 

Den vision di MEP nos lo atende cu e tema di criminalidad den dos paso.

Paso 1 ta controla nos fronteranan mas estrictamente pa evita importacion ilegal di arma, droga y persona. Y una bes nos fronteranan ta sigura, cu Paso 2, nos lo pone orden paden den cas.

Cu man duro y sin miedo nos lo mustra criminalnan cu nan ta enemigo di nos pais.

Nos lo inverti pa Cuerpo Policial tin suficiente personal y material pa nan por combati criminalidad cu man duro.

 

E vision aki nos ta treciendo den cada hogar y cu ne e speransa cu pronto e cambio ta na caminda, e cambio pa haci Aruba mas sigur atrobe. MEP a hacie den pasado y MEP ta prepara pa bolbe hacie. Un Aruba sigur y trankil pa nos muchanan y pa nos grandinan, un Aruba cu nos tur ta orguyoso di dj’e atrobe”, segun lider di MEP Evelyn Wever-Croes.

Top