Evelyn Wever-Croes (MEP): Ban trece ordo y respet bek den comunidad

Partido MEP den fin di siman a cuminsa su campaña intensivo den Savaneta. Ya desde oranan trempan di mainta un multitud di como 100 persona a aglomera na e Cede na Savaneta pa campaña hunto cu e candidatonan. Durante henter dia por a mira nan movecionnan den e barionan di Savaneta.

 

“Nos ta hopi contento cu e recepcion den Savaneta. Nos a wordo hopi bon ricibi, y bo ta sinti cu tur hende kier un cambio. Savaneta ta un bario cu a sufri hopi bou construccion di e caretera di vierbaansweg, pero e camindanan den e barionan mes ta den hopi mal condicion. Ni cuanto nan a pidi atencion pa esakinan, nan a wordo neglisha y laga na caya.

Nos ta splica tur habitantenan cu awor ta suficiente den inversion di estetica, ta tempo pa un cambio pa pone e ser humano central atrobe. Seguridad, di cual lusnan den bario ta un necesidad, cuido di salud, careteranan den bario den bon condicion”, segun Evelyn Wever-Crpes.

 

“Un otro problema serio ta e problema di criminalidad den Savaneta, hortamente y bendemento di droga, cu den esey tur hende cu nos a papia cu nan ta duna nos rason cu e Gobierno aki a faya. Nan ta duna MEP rason cu nos mester atende cu criminalidad cu man duro. Ordo y respet nos mester trese bek den nos comunidad”, Wever-Croes ta splica.

 

“Di e forma aki nos ta sigui haci nos bishitanan den tur bario pa nos scucha di e habitantenan mes kico nan kier mira wordo cambia na Aruba, y kico mester ta e prioridadnan di e siguiente Gobierno. Un Gobierno di pueblo y pa pueblo”, lider di MEP, Evelyn Wever-Croes a duna di conoce.

Leave a Reply

Top