Evelyn Wever-Croes (MEP): Ban uni y celebra Dia di Betico

Lider di MEP, sra. Evelyn Wever-Croes, den cuadro di celebracion di Dia di Betico ta extende un invitacion na henter comunidad pa uni y celebra Dia di Betico den union.

 

“Dia 25 di januari no ta djis otro dia liber na Aruba. Maske cu hopi hende ta contento cu e dia ey ta un dia liber, no ta tur ta realisa su nificacion. Dia 25 di januari nos ta celebra e fecha natalicio di Betico Croes, Libertador di Aruba. Ta danki na e gran homber aki Aruba a haya su Status Aparte na 1986. Prome cu 1986 Aruba tabata forma parti di Antiyas Hulandes, y apesar cu Aruba tabatin hopi potencial pa desaroya, bou di constelacion Antiyano Aruba tabata wordo impidi pa desaroya, y hopi inhusticia tabata wordo cometi contra Arubianonan”, Evelyn Wever-Croes a splica.

 

“Nos hendenan tabatin un anhelo fuerte di por ta baas den nan propio cas, pero como tur decision tabata wordo tuma na Corsou, Aruba no tabata haya parti husto di locual tabata toke.

Asina a cuminsa lanta bou di e pueblo Arubiano e deseo di bay los di Antiyas Hulandes, pa na Aruba mes nos por tuma nos propio decisionnan, y naturlamente para responsabel pa e consecuencianan. Ta danki na e lucha aki cu a culmina dia 1 di januari 1986, awe nos por ta autonomo den Reino. Ta danki na nos Status Aparte nos a crece como un pais soberano den 30 aña y nos por a desaroya nos economia, especialmente turismo. Si no tabata pa e desaroyo ey, awe Aruba no ta unda e ta”, lider di MEP a continua bisando.

 

“Gran parti di nos pueblo ainda ta corda con cos tabata bou constelacion antiyano. Pero tin den nos comunidad hendenan cu no a experiencia esaki, p. e. esnan cu a bin biba na Aruba den ultimo 30 aña. Ta importante si pa tur hende sigui ta consciente cu ta danki na e Status Aparte, bou guia di Betico Croes, y e prosperidad cu e Status Aparte a trece pa nos e personanan aki a scoge pa bin biba na Aruba en bes di scoge pa bay biba p. e. na Corsou, Sint Maarten of otro islanan di Antiyas. Pasobra e Status Aparte a trece prosperidad pa hopi hende.

Ta p’esey ta importante pa nos sigui realisa e balor di nos Status Aparte, pa nos por sigui lucha pa conserv’e”, Wever-Croes a duna di conoce.

 

UNION

“Union semper tabata nos forsa, y esey lo sigui ta nos forsa. Betico a logra uni nos pueblo y asina a logra realisa e anhelo di nos pueblo. Esaki ta momento cu nos tambe mester uni pa por enfrenta e retonan grandi nos dilanti”, Wever-Croes a enfatisa.

 

“Riba Dia di Betico, ban tuma tempo un rato pa reflexiona riba kiko Betico y e Status Aparte kiermen pa cada un di nos. Laga nos celebra e dia aki, acudi na eventonan cu ta wordo organisa rond di henter nos isla. Laga nos celebra Dia di Betico manera un pueblo uni, y orguyoso di locual Betico a significa pa nos, y tur e prosperidad cu nos Status Aparte a trece pa nos cada un”, lider di MEP, Evelyn Wever-Croes a conclui.

Top