Evelyn Wever-Croes (MEP): MEP ta preparando pa goberna Aruba Inventarisacion di tur scol cu mester di mantencion y renobacion

Den conferencia di prensa semanal di MEP sra. Evelyn Wever-Croes a duna di conoce cu MEP ta preparando pa goberna nos pais. Den un documento cu e lider di MEP a mustra na prensa, tin un inventarisacion di tur scolnan na Aruba cu edificio mester di mantencion y renobacion.

Naturalmente mester pone atencion tambe na e calidad di enseñansa, y e sosten pa docentenan. MEP ta trahando riba tur esaki.

 

“E Gobierno aki a haci demasiado poco pa nos enseñansa, y esey ta resalta den e rapport cu nos a laga traha pa inventarisa e estado di cada scol.

Desde oposicion nos ta preparando pa goberna Aruba, y den e rapport aki “school project – our children are the future” tin stipula exactamente con nos lo pone tur edificio di scolnan den bon estado atrobe, segun un plan riba termino corto y riba termino largo.

Nos muchanan merece un miho enseñansa, y sigur nan tur merece di haya les den un edificio nobo y moderno.

 

Mi colega Chris Romero lo elabora mas di esaki den e siguiente dianan. Nos compromiso ta cu nos muchanan, y p’esey awor caba nos a cuminsa prepara, p’asina cu nos drenta Gobierno nos no perde tempo y cuminsa soluciona problema mesora”, Evelyn Wever-Croes a duna di conoce.

Top