Evelyn Wever-Croes (MEP): Nos kier scucha e voz di e hobennan den campaña 2017

Lider di MEP Evelyn Wever-Croes a duna di conoce cu kier scucha e voz di e hobennan den e campaña electoral aki.

“Ta nos hobennan mester bay paga e MEGA DEBE cu e Gobierno di AVP a crea riba nos pais, pues nan mester tin un voz den e decisionnan. Nos ta envolve nos hobennan hopi den nos campaña, pa lanta nan interes den politica. Asina nos ta crea hobennan responsabel den nos pais, y cu ta sinti e responsabilidad den decisionnan di nos pais”, Wever-Croes ta splica.

 

Enseñansa y trabou

“Mi a reuni cu un focus group di hobennan y nan ta trece padilanti cu e tema di enseñansa y trabou tin nan hopi preocupa diariamente. Nan kier tin sigur cu si nan pone tur nan esfuerso den nan estudio, cu mayan nan tin un diploma den nan man cu bal algo, y por garantisa nan un trabou.

Nan ta mira hopi hoben trahando serca di e Ministernan ta gana hopi placa, pero sin ningun estudio of preparacion, y nan ta hopi desapunta den e Gobierno di Mike Eman, pasobra esey no ta e bon ehempel.

Den nomber di MEP mi a garantisanan cu e tipo di abusonan aki ta caba, y nos lo mehora e calidad di enseñansa p’asina no tin ningun duda den e balor di e diploma. Alaves nos lo percura pa empleo pa nos hobennan”, lider di MEP a remarca.

 

Studiantenan na Hulanda

“MEP tin un focus group di hobennan na Hulanda tambe activo, y nan a trece e mesun punto ey padilanti, cu e ta masha demotivante cu nan si ta studia y nan si ta keda cu e debe di estudio grandi, pero por bin gana 3 pa 4 mil florin, siendo cu otro hobennan cu tin “partij diploma” ta gana 9 mil florin.

Ademas, nos hobennan na Hulanda ta sumamente preocupa pa e fiansa di estudio. Gobierno di AVP a bin cu e descuento di 30% si nan paga nan debe den un biaha, pero manera nan mes ta bisa: di unda nos ta bay saca e placa pa pag’e den un biaha?

MEP ta garantisa nan cu e fiansa di estudio di Aruba lo bira completamante liber di interes, y nan por deduci e pagonan di e debe for di nan entrada. Esaki nan ta mira como un solucion mas realistico”, segun Wever-Croes.

 

“E diferente focus groups ta den pleno preparacion pa debati riba mas tema di importancia pa e hobennan. Si abo tambe kier participa, na Aruba of na Hulanda, tuma contacto cu nos via email evelyn@campaña2017.com, Facebook #TeamEvelyn, of via na cell 5643211.

Nos kier scucha e voz di nos hobennan den campaña 2017. Ban p’e cambio, sin miedo”, lider di MEP, Evelyn Wever-Croes a duna di conoce.

Top