Evelyn Wever-Croes: MEP ta atende problema financiero di Aruba sin medida

Lider di MEP, Evelyn Wever-Croes den conferencia di prensa a elabora riba e situacion financiero di pais Aruba.

Lider di MEP a cuminsa cu splica con serio e problema financiero di Aruba ta, mirando cu e debe di nos pais ta actualmente 86% di e GDP.

Berdad pa logra algo den bida, bo mester haci debe, pero no asina hopi.

Banco mes ta tene cuenta te cu 1/3 parti di bo entrada pa prestabo placa, no 86%. CAFT tambe a enfatisa cu lo dura 27 aña pa nos yega bek n’e nivel cu MEP a lage na aña 2009.

 

VISION DI MEP: SIN MEDIDA

MEP tin un plan con pa atende cu e situacion financiero di pais Aruba SIN medida.

Prome paso lo ta baha gasto di Gobierno cuminsando cu baha e cantidad di Minister, corta den nan gastonan di biahe, fiesta, propaganda y abogado, y abo por scapa 70 miyon florin pa aña.

Di dos paso lo ta pa refinancia nos debe y baha e interes cu nos ta pagando awor, cu ta 200 miyon florin pa aña.

Di tres lo ta pa desaroya nos economia di berdad, p’e placa keda aki na Aruba mes.

 

“Nos lo concentra riba varios pilar economico, p’asina yega na un crecemento stabiel di nos economia. Yuda hobennan pa desaroya nan propio negoshi, atrabes di e Banco di Desaroyo. Pilar economico di IT, agricultura cria y pesca, turismo medico, turismo di arte, turismo deportivo. Tur esaki nos lo desaroya pa percura cu economia lo draai.

Negoshinan lo paga belasting y nos cuidadanonan lo haya un mihor trabou y lo paga belasting tambe e ora.

Basa riba esakinan nos lo atende cu e problemanan financiero di Aruba SIN medida”, e lider di MEP, Evelyn Wever Croes a duna di conoce.

 

HAMAS ARIBA A CONOCE ASINA TANTO MEDIDA MANERA CU MIKE EMAN

Lider di MEP a mustra un lista masha largo di medida cu Gabinete Mike Eman a tuma contra pueblo, p’asina nan por a bay na 9 Minister, y mas di 500 coordinador.

“Hamas antes den historia di nos pais, Aruba a conoce asina tanto medida y belasting nobo manera den e 8 añanan di Gabinete Mike Eman. No solamente e 9 Ministernan actual di e Gabinete, pero tambe esnan cu a bay, y hasta esun cu a bolbe.

Nan tur ta laga atras e legacy di a introduci mas tanto medida y belasting nobo den nos pais.

 

MEP tin un plan y un vision, cu lo atende cu e tema financiero cuminsando serca e Minister y Parlamentarionan. Sin mester bin cu medida.

AVP den 8 aña a abusa di pueblo, haciendo gastonan enorme, y pone pueblo paga pa tur cos. MEP lo trece e alivio ey”, ta palabranan di Evelyn Wever-Croes, lider di MEP.

Leave a Reply

Top