Evelyn Wever-Croes (MEP): Urirama ta prueba cu Mike Eman no tin medio ambiente na pecho

Lider di MEP Evelyn Wever-Croes tambe a reacciona rib’e biahe relampago di Prome Minister Mike Eman pa Colombia siman pasa, pa conta parha.

 

“Nos pais ta pasando den e pero crisis den criminalidad. Cada pasa un dia tin un atraco cruel y brutal riba ciudadanonan inocente. Gobierno di su parti no ta mustra ningun señal di convivencia cu comunidad. Minister di Husticia no a tuma ningun accion adicional, y Prome Minister Mike Eman a biaha pa Colombia pa conta parha.

 

Riba su mes, e tema di medio ambiente tambe ta un tema importante, y mi ta elogia ATIA pa a mira e importancia y permiti un grupo di hobennan biaha pa Colombia. Asina e conscientisacion bou di nos hobennan ta aumenta”, segun Evelyn Wever-Croes.

 

“Sinembargo, e accion di parti di Prome Minister Mike Eman si ta un acto di hipocrecia. Pasobra na Aruba Mike Eman no tin cunes kico e ta haci cu flora y fauna di nos pais.

El a laga rosa cantidad di mangrove pa construi e caretera cu e ta yama “Green” Corridor, pero di “Green” e caretera no tin nada”,

 

Ademas, bou autorisacion di Mike Eman a rosa gran parti di Bubali Plas, y esaki tambe ta contra nos medio ambiente. Y sin lubida e molinanan na Urirama cu Mike Eman tabata kier a instala basta tempo pasa, pero debi na casonan den Corte no por a continua cu su plan”, Wever-Croes ta splica.

 

CASO NOBO DEN CORTE

“Na october 2015, Gobierno a bolbe duna parke di biento Urirama un permiso nobo pa e molinanan. Habitantenan a bolbe manda carta di obhecion, y a gana e caso aki na Bezwaar Advies Commissie LAR, sinembargo, Mike Eman a dicidi di no sigui e conseho di LAR, y toch a keda para rib’e permiso.

Awor habitantenan mester cuminsa un otro caso den Corte pa para e proyecto pasobra e permiso na Urirama ta contra e ley di ROP, e mesun ley cu habitantenan di Malmok a uza contra e hotel den nan bario. E ley di ROP nunca a wordo cambia, y e ley ey ta prohibi molinanan di biento na Urirama”, Wever-Croes a mustra.

 

“Ademas, e proyecto di Urirama ta trece cu ne cu e parti mas bunita di nos naturalesa na Aruba, ta bai perdi. Turistanan ta bishita e area tur dia, no pa wak molina di biento pasobra esey nan ta wak na nan pais caba. Nan ta bishita e area di Urirama pa e bunita naturalesa.

Aparte di esey e permiso nobo pa Urirama ta contra principionan di bon gobernacion tambe, pasobra no a tene suficiente cuenta cu interesnan di e habitantenan.

Habitantenan tin un interes principal cu ta e riesgo cu e molinanan por causa na salud di nan yiunan y nan mes. Gobierno ta mustra un terkedad di no kier haci un “Health Impact Study”, Wever-Croes a continua bisando.

 

“Directie Volksgezondheid a pidi Gobierno placa pa por haci e studio ey, pero Gobierno no kier hacie. Gobierno ta referi na otro estudionan tocante medio ambiente, y kier uza esey pa salud.

Sinembargo, e otro estudionan ey no ta specialisa riba salud. Gobierno ta di opinion cu e interes general ta mas importante, y e interes general ta pa na aña 2020 logra yega 100%

energia alternativo na Aruba, y p’esey no mester tene cuenta cu naturalesa ni salud di habitantenan.

P’esey Gobierno ta insisti pa bin cu e molinanan y ta pidi e habitantenan pa sacrifica naturalesa y salud di nan yiunan y di nan mes.

 

Si Gobierno kier pa habitantenan sacrifica nan yiunan, por lo menos Gobierno por laga haci un studio rib’e efectonan riba salud manera debe ser. Esey ta locual habitantenan ta pidi. Dicon Gobierno no por considera esey?”, lider di MEP ta cuestiona.

 

VISION 2020 TA IREALISTICO

“Ademas, e vision 2020 ey ta un vision totalmente irealistico y no ta alcansabel. Cu un simple reken som di scol basico bo por prueba esey.

Na 2009, danki na e molinanan na Vader Piet di Gobierno di MEP Aruba a logra yega na 22% di energia alternativo. Kico Gobierno di Mike Eman a haci?

 

Den 7 aña di Gobierno, apesar di gasta miyones y miyones na su vision “green”, Mike Eman a logra apenas 3% adicional energia alternativo cu e panelnan solar na airport.

Pues awor Aruba ta para na 25%. Falta apenas 3 aña pa 2020, bo ta kere realmente cu e pais cu Mike Eman a manda bancarota, por bay di 25% pa 100% den apenas 3 aña, y sin placa?

Si den 7 aña nan a traha 3%, den 3 aña nan por traha 75%? E contesta ta NO”, segun Wever-Croes.

 

“P’esey e vision 2020 di Mike Eman ta un vision irealistico. Pues no ta husto pa pidi habitantenan pa sacrifica nan salud y di nan yiunan, pa un vision irealistico!

Gobierno ta dispuesto pa sacrifica e area sagrado di kapel di Alto Vista, y destrui e paz na nos kapel. Ademas, kier sacrifica tambe e area di naturalesa. Y dicon? Pa un vision totalmente irealistico!

 

No ta pasobra Prome Minister Mike Eman a bisa cu esey ta su deseo, esey mester ta un vision. Nos no mester kere tur locual Mike Eman ta bisa. Mike Eman tin un tendencia serio di gaña. Aruba kier gobernantenan cu ta honesto y integro, cu ta bisa locual nan ta haci y ta haci locual nan ta bisa. Ban mustra respet pa nos naturalesa y pa bida y salud di hende”, lider di MEP Evelyn Wever-Croes a finalisa bisando.

Top