Evelyn Wever-Croes: “Mi a alerta Paul Croes varios biaha den pasado cu AVP no ta di confia”

Lider di MEP Evelyn Wever-Croes den un entrevista cu Hans Geerman diabierna mainta a expresa su mes tocante e caso di Paul Croes.

“Ami a alerta Paul na mas di un ocasion p’e tene cuidou. Relaciona cu e escandalo di permiso, mi mes a haci’e pregunta na januari 2015, pasobra mi a haya pruebanan di ‘ontheffing’ cu el’a firma, cu no tabata mustra bon.

 

Durante tratamento di presupusto 2015 algun siman despues mi a bise personalmente ‘Paul, tene cuidou, pasobra hopi cos straño ta pasa den bo Ministerio.

Mi no sa si bo tambe ta meti aden, pero nan ta pasa bou di bo nanishi y pues bo sa di nan. Cuidou pasobra bo ta den AVP y bo ta un CROES, y nos tur sa kico AVP ta haci cu e CROES nan’.

Un mesun tipo di alerta Glenbert Croes tambe a duna Paul Croes.

 

Lamentablemente Paul no a scucha mi conseho, y awe e ta den e problema aki cu e ta.

Pesey mi a haya e expresion di e lider di fraccion di AVP ridiculo, ora el’a declara cu AVP ta den shock, pasobra henter AVP tabata sa di e corupcion aki, pero nan a scoge pa sostene corupcion y ningun di nan a haci nada pa para e cosnan aki.

 

TUR e Parlamentarionan di AVP ta mes culpabel n’esaki, pasobra enbes di controla Gobierno, nan mes a bay sconde pa Gobierno.

Y awe ta nos tur ta pasa berguensa cu e escandalo aki, un berguensa cu por a wordo evita. Ami a trata tur mi posibel pa avisa Paul, pero lamentablemente e no a scucha”.

Top