Evelyn Wever-Croes na Mike Eman ta iresponsabel pa hisa benta e carteranan di Paul Croes den scochi di Bermudez

“Cu un asombro grandi mi a tuma nota di e declaracionnan di Mike Eman y Paul Croes para banda di otro diahuebs atardi. Mi a pensa cu tabata un conferencia di prensa y mi a keda straña cu prensa no a haci pregunta riba locual nan a declara, pero despues mi a compronde cu Mike Eman y Paul Croes a graba scondi den un estudio, leu di prensa, y despues a djis manda prensa e grabacion.

 

Dicon e asombro? Pasobra mundialmente ora un gobernante ta blanco di investigacion criminal serio manera esun di Minister Paul Croes, e ta tuma retiro su mes, of si lider di Gabinete ta retire.

Pero den AVP tur cos por, y berdad un biaha mas nan a asombra nos cu un novum: E Minister no tin cu retira, pero e Minister mag di tuma un sorto di vacacion cu pago.

E declaracion aki a crea hopi confusion. Especialmente empleadonan publico ta puntra nan mes ta kico esaki ta y si e por ta aplicable riba nan tambe.

 

No solamente e declaracion aki a causa confusion, sino e ta ILEGAL, pasobra nos Constitucion ta stipula ki ora un hende ta bira Minister y ki ora e ta baha como Minister. Tambe den ki caso e por tuma vacacion, pero e locual Eman y Paul Croes a palabra, no ta cay bou di ningun regla conoci na Aruba.

 

Decision iresponsabel. E decision di Mike Eman ta cu Paul Croes por bay cas cu pago pa un tempo indefini, anto mientras tanto Angel Bermudez ta tuma over e carteranan di Paul Croes: Labor, Asunto Social y HUBENTUD! E ultimo aki ta hilarico, pasobra henter Aruba ta di acuerdo cu Angel Bermudez no ta e mihor candidato pa Minister di Hubentud.

 

Hulanda a nenga Angel Bermudez di bira Gobernador pa motibo di su edad, y na Aruba Mike Eman ta nombr’e Minister di Hubentud! Esaki ta un falta di respet sigur.

Sinembargo e no ta solamente un falta di respet, e ta un acto iresponsabel, Angel Bermudez tin su mannan yen cu e problemanan financiero serio di Aruba, manera IMF a bolbe señala.

 

Riba dje Bermudez ta encarga cu tur departamento di Gobierno. Awor ta hisa benta riba dje LABOR, den temporada di desempleo y hopi presion laboral. Ta hisa benta riba dje HUBENTUD, cu tin tanto desafio y problema awor den nos comunidad.

Y riba dje ta hisa benta e cartera di ASUNTO SOCIAL, cu e explosion na problemanan social y falta di atencion na institutonan social.

Berdad bo ta kere cu Angel Bermudez por atende cu tur esaki? Claro cu no.

 

Pesey mas enfasis ta wordo poni riba e hecho cu e Minister sin cartera, Paul Croes, no por keda Minister. Nos pais ta atravesando demasiado problema pa laga e carteranan aki bira carteranan di segunda categoria.

Paul Croes mester tuma su retiro, e ta cobra su overbruggingstoelage tur luna tog pa un aña, y mester nombra un otro Minister na su lugar of mester reparti e cartera na un forma mas responsable bou di tur miembro di Gabinete. Esey ta locual pueblo kier, y esey ta locual Aruba tin mester aworaki.

 

Nada contra Paul Croes personalmente, maske e hecho cu e tene honor na su mes y tuma su retiro, a desapunta hopi hende cu ainda tabata kere den dje”, tabata palabranan di Evelyn Wever Croes.

Top