Evelyn Wever-Croes: Paga candela di dump y baha e sero di sushi

Un tema importante trata durante e debate di millennials ta e tema di medio ambiente.

Prome cu papia di cualkier otro tema di medio ambiente, nos mester soluciona e problema di dump. Si bo cana den Parkietenbos, Simon Antonio y vecindario, bo ta sinti e molester di huma y candela, y di musca. Evelyn Wever-Croes ta splica.

 

E solucion riba termino corto pa MEP ta:

  1. Paga e candela y percura pa e candela no sende mas. Pa elimina e molester di huma y candela cu awor ta e problema mas serio. Mester pone tubonan den e sero di sushi, p’e gas por sali sin causa explocionnan bou di e sero p’asina evita candela.
  2. Sushi cu ta wordo hiba eynan tur dia mester wordo procesa mesora. Si ta e planta cu a wordo boycotia, of otro planta, no ta interesa mi. E problema mester wordo soluciona, p’asina sushi cu drenta wordo procesa pa evita cu e sero sigi crese
  3. Despues mester cuminsa na baha e sero di sushi door di procesa e sushi of exporta e sushi.

 

MANEHO DI SUSHI

Pa yega na un solucion structural rib’e tereno di medio ambiente, nos mester desaroya un maneho responsabel di sushi riba henter Aruba, especialmente p’e dumpnan ilegal y pa conserva nos medio ambiente. Un maneho responsabel di sushi meste rta basa riba separacion di sushi y conscientisacion. Ban conscientisa nos muchanan cu nan mester tene Aruba limpi, y nan mes lo educa nan mayornan. Nos campaña di conscientisacion lo ta basa riba e 3 “R” nan: Reduci sushi, re-uza mas tanto posibel, y recicla sushi, lider di MEP ta mustra.

 

MANEHO STRUCTURAL DI MEDIO AMBIENTE

Un maneho structural riba tereno ambiente mester ta basa rib’e sigiente puntonan:

  1. Maneho structural riba desperidicio na Aruba, ancra den ley
  2. Maneho responsabel riba medio ambiente: reserva e areanan di naturalesa realmente pa naturalesa
  3. Ley di medio ambiente, cu autoridad pa actua y cu multanan pisa
  4. Marine park, pa proteccion di nos bida marino
  5. MER-committee cu autoridad pa controla estudionan di impacto riba medio ambiente, y nan ehecucion.

 

Indudablemente e vision di MEP rib’e tereno aki ta mustra e prioridad, e ta realistico y a cay den hopi bon tera. Cu esaki lider di MEP a score hopi halto den e ultimo debate, esey ta algo cu te dia di awe hendenan ta comenta riba Aruba, Evelyn Wever-Croes ta conclui.

Top