Evelyn Wever-Croes preocupa pa cobransa di AZV pa pensionadonan Gobierno ta cobra pensionadonan dimas AZV y belasting

Semanalmente lider di MEP Evelyn Wever-Croes ta ricibi personanan na Cede di MEP cu mester di un of otro ayudo. Sea di belasting, of asuntonan di onderstand of legal.

 

“Locual cu mi a constata yudando nos pensionadonan ta cu nan ta hayando cobransanan di AZV hopi inhusto. Pa cuminsa e tarifa di AZV ta hopi halto pa pensionadonan.

Un pensionado mester paga 10,5% di su pension na prima di AZV, siendo cu un persona cu ta traha ta paga 1,6% di prima so. Den esaki nos mester trece cambio y rebaha e prima di pensionado pasobra 10,5% pa e pensionado paga ta demasiado halto”, segun Wever-Croes.

 

“Pero no ta esey so ta e problema. E problema mas grandi ta cu SVB ta retene di menos di e pensionadonan. SVB ta haci uzo di un areglo bieu, y no ta tene e prima completo di 10,5%.

Y esaki ta pone cu ora e pensionado haya un cobransa na fin di aña, e ta haya pa paga EXTRA na AZV. Tin biaha e AZV ta bin mas halto cu e belasting mes. Esaki no ta husto, pasobra ta e pensionado ta sali perhudica”, lider di MEP ta splica.

 

“E problema mas grandi ta keda e cumulacion di pensioen. Ora un pensionado cu ta haya e pensioen di biehes haya un otro entada acerca, e ta hay’e cu cobransanan di mil florin bay ariba. Esaki ta pasobra ainda e Gobierno aki ta cobra belasting riba pensioen di biehes.

Nan ta bisa cu nan a purba cambi’e, pero puntra cual pensionado cu bo kier, y bo lo scucha cu nada a cambia, ta pio cos a bira. P’esey nos lo elimina e belasting riba pensioen di biehes”, Wever-Croes ta bisa.

 

“Pensionadonan ta esnan cu mas a wordo neglisha den e ultimo 8 añanan. Nos mester percura miho pa nos grandinan, y MEP lo percura pa alivia nan peso di belasting. E ta mi area di experticio y mi sa exactamente con pa hacie. Nos compromiso cu nos pensionadonan ta pa alivia nan peso di belasting, elimina belasting riba pensioen di biehes, y baha e prima di AZV pa pensionadonan”, asina lider di MEP, Evelyn Wever-Croes a duna di conoce.

Top