Evelyn Wever-Croes: “Si di berdad abo kier proteha nos naturalesa; ban hunto p’e cambio, sin miedo”

Lider di MEP Evelyn Wever-Croes den conferencia di prensa semanal di su partido a trece dilanti kico e kiermen cu e slogan “Ban hunto p’e cambio” y a pone esaki den contexto di proteccion di nos naturalesa.

“Pa por protehe nos naturalesa di berdad, nos mester bin cu e ley di medio ambiente. Sin e ley, e destruccion ta sigi, y ningun hende ta carga responsabilidad.

Cu e ley di medio ambiente, tur hende sa kico por y kico no por. Y tur hende sa kico t’e consecuencianan y e castigonan na momento cu bo viola e ley.

 

Ta asina so bo por logra proteccion di nos naturalesa. Ademas nos mester di gobernantenan cu ta bisa loke nan ta haci y ta haci loke nan ta bisa. No gobernantenan cu ta pretende cu nan tin naturalesa na pecho, pero den practica ta destrui naturalesa constantemente.

 

GOBIERNO DI AVP A DESTRUI NATURALESA

Pasobra si bo mira bon, Gobierno di AVP a hipoteca nos pais cu storianan “berde” y di proteccion di nos medio ambiente.

Pero kico nan a haci realmente? Destrui gran parti di nos naturalesa.

Mangrovenan, Bubali Plas, beachnan. Urirama, Spaans Lagoen y awor tambe Rooi Frances.

 

E Gobierno aki no a haci nada pa protehe nos naturalesa, es mas, e Gobierno aki a permiti nan desaroyadornan destrui naturalesa valioso na Spaans Lagoen, Pos Chikito, Bubali Plas, Rooi Frances y por poco tambe na Urirama.

Pesey e Gobierno aki bo no por confia cu nan lo haci algo pa protehe nos naturalesa. Si den 7 aña nan no a haci’e, den e 7 lunanan cu ta resta sigur nan lo no haci’e

.

BISHITA DI PRINSES BEATRIX

E siman aki cu Prinses Beatrix ta di bishita na Aruba riba invitacion di Parke Arikok. Durante su bishita lo traspasa Spaans Lagoen pa Parke Arikok, p’asina purba evita cu mas daño lo wordo haci n’e area bunita di Spaans Lagoen.

Hustamente e siman di e bishita Real, Aruba ta habri cu un tristesa grandi p’e destruccion di Rooi Frances. Algo cu a afecta henter nos comunidad.

 

Y no tin ningun logica, ni hustificacion. Y un simple disculpa no ta suficiente. Pesey nos mester di un cambio real.

Si di berdad abo kier proteha nos naturalesa, uni bo mes na e cambio. Hunto nos ta ban p’e cambio, y sin miedo” segun lider di MEP Evelyn Wever-Croes.

 

Top