Evelyn Wever-Croes: Si e leynan cu MEP ta lucha p’e a pasa, awe Aruba lo no ta pasa berguensa cu escandalo den Gobierno

Den conferencia di prensa di MEP, Evelyn Wever-Croes a reacciona riba e caso di investigación contra Minister Paul Croes, y el’a señala cu pa nan e no tabata un sorpresa. Ya na januari 2015 MEP a cuestiona Minister riba e tema aki, pero e Minister a bari tur cos for di mesa.

Awe nos ta mira cu e berdad ta bin padilanti cu di berdad tin un corupción enorme den e tema di dunamento di ontheffing y permiso di labor.

 

Esaki ta prueba un biaha mas cu Aruba ta fayando. Aruba t’e único pais den Reino Hulandes cu no tin regalanan riba e tereno di integridad. Partido MEP desde mei 2014 a prepara un nota “INTEGRIDAD”.

Integridad ta algo cu bo tin of bo no tin! Integridad ta ora bo ta haci lo corecto, te hasta ora ningun hende ta wak.

Pa nos di MEP integridad ta crucial den gobernacion. Casonan manera Strawberry-gate, Lainda-gate, Kiko Gomez-gate, Bushiri-gate, Insure-to-Study-gate, Eva Maria-gate Rincon-gate y tur e negoshinan cu tereno a trece duda serio den integridad di gobernantenan di Aruba, no solamente serca nos, sino tambe serca politiconan den Reino.

Mientras cu demas paisnan den Reino tin leynan pa garantisa integridad den gobernacion, Aruba t’e unico cu no tin esakinan.

E plan di MEP pa crea un Gobierno basa riba integridad ta basa riba algun proposicion concreto.

 

LEY DI FINANCIAMENTO DI PARTIDONAN POLITICO

Nos di MEP ya pa algun aña ta bogando pa bin cu e ley di financiamento di partidonan politico, p’asina evita cu placa di baho mundo ta wordo usa pa hiba campaña electoral, manera a pasa den e ultimo campaña electoral cu hopi miyones a wordo hinca den campaña pa partido AVP di procedencia desconoci.

Na otro paisnan den Reino esaki no ta posible, y partidonan politico mester publica fondonan cu nan haya. T’aki na Aruba so e fiesta ta continua.

 

SCREENING DI MINISTERNAN

Otro areglo cu nos tin cu mehora t’e forma con ta screen politiconan. Si futuro Ministernan mester a pasa e screening manera na Hulanda, lo e Gabinete actual no ta consisti di e mesun hendenan, según Evelyn Wever Croes.

Hecho ta cu Gobernador no ta hunga un papel crucial mas den screening di gobernantenan, y esey mester cambia.

 

OMBUDSMAN

Otro ley cu mester bin cu urgencia t’esun di Ombudsman, p’asina tin un defensor di pueblo, pa garantisa integridad riba tur nivel. Un Ombudsman lo atende cu kehonan di cuidadanonan riba actuacion no integro di gobernantenan.

E ley aki, acompaña pa uno di ‘klokkenluiders regeling’, mester brinda proteccion n’esnan cu ta denuncia corupcion den Gobierno.

 

CODIGO DI CONDUCTA

Tambe nos di MEP ta insisti pa bin cu un Codigo di Conducta pa Minister y Parlamentarionan p’asina evita cualkier impresion cu un Minister ta paga fabornan politico n’esnan cu a financia su campaña.

Na Aruba nos a nota cu regularmente gobernantenan ta wordo menciona den escandalonan, un tras di otro, pa faborece amigonan.

E casonan di Bushiri-gate, Strawberry-gate, seguro di studiante Insure-To-Study y e fiesta di permiso, sin papia mes di negoshi cu tereno tur ta escandalonan, cu veredictonan di Hueznan imparcial cu ta papia palabra cla: Gobernantenan ta actua na forma iregular.

 

Esaki t’e plan di MEP cu nos a presenta na institutonan local, y n’e reunionnan di IPKO varios biaha caba, pero cu lamentablemente no ta haya atencion na Aruba mes.

Danki n’e presion cu MEP ta eherce, tin poco movecion di parti di Parlamentarionan di AVP, pero nada a concretisa ainda den ley.

Nos no ta kere cu AVP lo haci algo cu e leynan aki mas tampoco. Pero nos ta prepara pa nos mes bin ehecuta e cambionan necesario.

Unico cos cu falta ta pa haya e sosten grandi di mayoría di nos pueblo pa nos percura cu escandalonan asina no pasa nunca mas.

 

E plan di MEP lo garantisa integridad den gobernacion bek, y lo libra nos pais di e escandalonan y e berguensa grandi cu nos pais ta pasando aden. Aruba lo haya gobernantenan integro atrobe, gobernantenan cu bo por ta orguyoso di nan”, según Evelyn Wever-Croes.

Top