Evento di BBQ na Cas di Partido AVP Ayo a resulta un exito rotundo

For di mainta tempran hendenan a cuminsa yega na Cas di Partido AVP na Ayo pa sinti e ambiente di positivismo cu tabata reina durante henter e dia. Por sinti e vibracion di entusiasamo den aire. Partido AVP a cende su motor y no tin nada cu por para e caravana berde mas. E motor a keinta y di aki te september e lo keda ronca y core sin para.

 

Di tur parti di Aruba hendenan a acudi na Ayo pa ta parti di e evento aki. Un evento unda amigonan a topa, conpartidarionan a saluda otro y unda e masa kier a brasa e lider maximo Mike Eman, kende manera semper tabata cana rond saludando su hendenan. Cu partido AVP ta fuerte y solido un bes mas a keda demostra diadomingo na Ayo. E trabou grandi cu tur hende por mira tur rond Aruba ta wordo nota. Hende ta consciente di esey.

 

Tur carchi di BBQ a wordo bendi y T-shirtnan cu a compaña e plato di cuminda a caba den un habri y cera di wowo. Esaki ta muestra palpabel cu miles di hende a yega Cas di Partido AVP Ayo. Un evento sumamente exitoso. Robert Maduro y su grupo Alma Next Level a deleita e publico, Perfect Sound a zembla e lugar, Tipico Alegre Cadushi Largo, Caha di Orgel Oslin Trimon y Caha di Orgel Nos Cultura, tur  a haci un cos treciendo bon ambiente, mescos cu DJ’nan conoci na Aruba manera Nutsbeatz, Stikcysoundz, DJ Sky y e anochi a caba cu e actuacion di e conocido Jeon kende a pone tur hende move riba su ritmo crioyo nobo.

 

E ambiente tabata di kita sombre. Caranan nobo a afilia nan mes cu e partido berde ‘there and then’. Por a mira ex-candidatonan di otro partidonan cu a bin eynan pa brasa lider di partido AVP y bise cu nan ta cu ne y su partido. Partido a habri brasa y a ricibi nan den forma caluroso. Pronto otro Casnan di Partido ta wordo inaugura mescos cu esun na Ayo, cu e mesun tremendo ambiente, e mesun calor cu tabata reina entre tur presente y e mesun compromiso pa duna e partido berde un periodo mas di gobernacion. Padilanti AVP ta bay, sin wak patras.

Leave a Reply

Top