Everon Jackson Hooi: Den cada “lulverhaal” tin un nucleo di berdad

Hunto cu Howard Komproe, Everon Jackson Hooi lo tey  diabierna den Cas di Cultura pa forma parti di “De Lulverhalen”.

Otro artistanan cu lo bay tey ta Jetty Mathurin y e nada mas y nada menos e inigualabel

Howard Komproe ta un di e artistanan cu lo bay tey na Aruba, den Cas di Cultura diasabra, dia 7 di april, pa 8’or di anochi.

E lo bay tey hunto cu e conocido comediantenan Jetty Mathurin y Everon Jackson y e inigualabel cantante Izaline Calister.

 

E biaha aki nan lo bin cu The Caribbean Edition, caminda cu lo bay tin yen di diversion, caminda De Lulverhalen lo bin cu su toke di humor masculino, formando asina un formula gigantesco cu ta garantisa un anochi fabuloso di diversion.

 

KEN TA EVERON JACKSON HOOI

Everon Jackson Hooi ta un actor Hulandes di origen Curasoleño, conoci pa su rol vast como Bing den e serie Hulandes Goede Tijden, Slechte Tijden y tambe como Ciro den e serie Hulandes, De Erfenis, kende na edad di 12 aña e tabata sa sigur cu ta actor e kier a bira y tabata manda su potretnan di scol pa oficinanan di casting.

E tabata wak su mes como un actor, pasobra semper e tabata participa den obranan teatral di scol.

Pero parce cu su trabao den manda su cartanan a surti, pasobra ya cu su 16 aña, el a logra haya varios papel. Pa un mucha, wordo rechasa pa di 350 biaha, ta simplemente duro, pero el a wanta duro y sigui kere den su soñonan.

 

Fuera di ta un actor den e serie Goede Tijden Slechte Tijden, Hooi ta traha hopi tras di cortina. Segun cu e ta conta nos, e zomer aki lo sali 4 revista, di cual e ta hefe di redaccion.

E seguramente e tin Corsou na su curason. El a conta nos cu e tin deseo di traha un pelicula riba e susedidonan di dia 30 di mei, 1969. Si tin esnan cu ta desea pa sostene e proyecto, e ta cla pa traha. Esey ta un storia cu siguramente mester wordo conta.

 

Hooi nunca a bin Aruba y e ta hopi ancios pa kico e experiencia aki lo ta. Ta pesey mes pa ta forma parti n’e Caribbean Edition di Lulverhalen ta algo sumamente emocionante pa Hooi.

Apesar cu e custuma di traha cu un script tog ta un reto p’e, pa para riba un escenario y conta su storia, su 18 añanan como un actor.

E publico ta loke e ta busca. E ta spera cu e publico bin cu hopi calor y amor. E tin hopi gana di nan energia.

 

Den cada “lulverhaal” tin algo di berdad, segun Hooi. E ta pensa cu e anochi aki lo bay ta un anochi hopi diverso, cu un hari y por ta hasta cu un lagrima.

Y tene cuidao p’e after-party! “Unda e ta eigenlijk?”. Carchinan ta obtenibel pa Plaza Bookshop y Superfood.

 

Top