Evita pa dumpnan sigui crece na Aruba; Seminario ariba kico ta economia circular  

E economia di produccion tradicional actual ta basa riba un sistema lineal, unda un producto ta wordo produci, uza y despues tira den baki di sushi pa finalmente termina na un dump manera Parkietenbos. E modelo aki ta conoci pa “take-make-dispose”.

Mescos cu azeta y gas, tur otro materia prima tambe ta birando menos riba nos planeta. Cu esey den bista continentenan a cuminsa crea un strategia cu lo yudanan bira sostenible y duradero den un economia circular.
Pa un desaroyo por ta sostenibel e sistema aki mester cambia unda producto of material na final di nan uzo ta bolbe bira un recurso pa un otro producto of materia sin perde e balor economico y keda re-uzabel, aplicando e proceso di re-uzo continuamente p’asina nunca nan termina como desperdicio.
Pa un economia asina, un forma di pensa nobo ta necesario cu diseño nobo y inteligente, un otro manera di uzo di e producto y materia, pensando den cada fase riba nan uzo den futuro.

Filosofia
Ehempel di un pensamento asina ta basa riba e principionan di e conocido filosofia di “Cradle to Cradle” cu e arkitecto McDonough y e kimico Aleman Braungart a inventa 20 aña pasa y cual Circular Economy ta basa riba dj’e. Ta importante cu tur industria, consumidornan y organisacionnan publico brasa e pensamento aki p’asina uza menos recursonan natural, pa re-uza mas producto y material pa evita desperdicio mas hopi cu ta posibel y alabes creando mas trabao pa hende riba tur nivel den tur sector di industria.

Tin mas filosofia cu ta cay bao di e pensamento circular manera: Blue Economy, Eco-Design, Cleaner Production Technology, Closed Loop Cycle Production y mucho mas.
E ultimo ya tin un compania local demostrando di ta un proceso exitoso.
Di tur e diferente filosofia “Cradle to Cradle” ta esun mas completo y desaroya.
Pa promove e pensamento aki e fundacion Americas Sustainable Development Foundation (ASDF), ta organisa un seminario cu e titulo “Understanding Circular Economy” cu e obhetivo pa tur participante haya sa kico ta un economia circular y con nos ta bay introducie riba nos isla.

Seminario
E seminario ta diseña special pa personanan den un posicion clave, trahando den sector publico, financiero y industria. Durante e seminario aki lo tin un presentacion di sr. Ken Alston, CEO di MBDC, e compania di McDonough y Braungart pa splica Cradle to Cradle® como mecanismo critico pa logra un economia circular y tambe e. o. un ehempel local na Aruba, unda ta aplica algun elemento di un sistema circular.

Importante ta cu un economia asina lo trece mas trabao na nivel halto, producto y material nobo cu ta tene nan balor no solamente te nan final di uzo pero te hasta despues. Asina contribuyendo na menos desperdicio y na termino largo en bes di tin un dump crea un luga unda recursonan cu balor ta disponibel pa nos economia.

E seminario aki ta tuma luga dia 11 di april venidero na Universidad di Aruba pa 5’or di atardi te cu 10’or di anochi. Pa mas informacion por acudi na e website: http://www.cep-americas.com of yama na oficina di ASDF, na 5872013.

Leave a Reply

Top