Ex vice Presidente di Argentina deteni pa erikesimento ilicito

E ex vice Presidente di Argentina, Amado Boudou, a wordo deteni diabierna na Buenos Aires.

E ex funcionario ta wordo acusa di integra un asociacion ilicito cu a comete presunto hechonan di labamento di placa, tempo cu e tabata fungi como Minister di Economia.

 

Boudou, kende tabata e di dos na mando durante e Gobierno di Cristina Fernandez, a wordo denteni hunto cu su socio, Jose Maria Nuñez Carmona.

E detencion a tuma luga na su lugar di residencia den e bario Puerto Madero di Buenos Aires.

Segun e demanda, tin mas o menos 80.000 dollar sin hustifica den su declaracion huramenta na 2002, como tambe inconsistencianan detecta den e investigacionnan riba 111 declaracion patrimonial entre 2002 y 2012.

 

Otro punto cuestiona ta e compra di un apartament pa 120.000 dollar di parti di su ex pareha, Agustina Kämpfer, na 2010, cu lo a wordo cumpra supuestamente c’un prestamo di e ruman homber di Boudou, cu no tabata acreditado.

E hues federal Ariel Lijo a ordena e detencion di Boudou (54 aña) den un causa hudicial inicia na 2012, alegando cu e lo por a interferi di manera negativo cu e investigacion, segun e resolucion hudicial.

 

Boudou lo wordo someti na un huicio oral den un otro demanda pa presunto corupcion, pa cual el a presenta tur siman cu tabatin audiencia hudicial.

E detencion a keda produci nuebe dia despues di e aresto pa presunto corupcion di e ex Minister Julio De Vido, kende a maneha obras publico durante e Gobiernonan di Nestor y Cristina Kirchner (2003-2015).

 

Leave a Reply

Top