Exitoso celebracion Dia Nacional di Amigonan di Archivo

Mas cu dos mil persona, hoben y adulto a bishita e exposicion “Aruba, ta nos tur!” di Archivo Nacional Aruba y e actividad cultural organisa pa Amigonan di Archivo dia 18 di maart ultimo.

E publico por a bishita un bunita exposicion, organisa p’e personal di Archivo Nacional na unda cu a ta duna hopi informacion tocante e mas di 130 nacionalidad cu a bin establece nan mes na Aruba.

E publico pafo por a disfruta di musica di DJ New Born y di Rincon Boysz, baile dor di Candy Dancers, Gucci Dancers, Grupo Folklor di Santa Cruz y Kids to Kids y Grupo nos Cultura, cuminda, cos dushi y a seca garganta na Archivo Nacional.

 

Bou di esnan cu a contribui cu nan bishita n’e exposicion, a rifa diferente premio manera un ‘monster tablet’ di SETAR cu a wordo gana pa sra. Burney Ermstang y diferente certificado di regalo di Superfood cu a wordo gana pa sr. Keith Stiell, sra. Delila Davelaar y sra. Humercinda Wouters.

E campaña di ‘Like & Share’ riba FaceBook tambe tabata exitoso y e premio a wordo gana pa sr. Richard Helder cu a gana un camera cortesia di Bon Bini Cargo.

 

Amigonan di Archivo ta gradici tur e boluntarionan cu a yuda cu nan trabou, tur esnan cu bende cuminda y cos dushi, e gruponan di baile y Rincon Boyzs pa nan presentacion.

E publico cu a bishita Archivo dia 18 di maart ultimo sin duda ta un publico hopi interesa den historia di nos pais.

 

Archivo Nacional y Fundacion Amigonan di Archivo lo sigui traha hunto pa ofrece hoben y adulto mas informacion tocante diferente aspecto di nos historia.

E exposicion lo keda habri pa tur interesado p’e siguiente lunanan, durante ora di oficina di 8.00 a.m. pa 12.00 p.m. y di 1.15 p.m. pa 4.00 p.m. Pa gruponan grandi, por haci un reservacion na telefoon 583-4880. Tur interesado ta bon bini!

Top