Expertonan riba ‘intercambio di conocemento’ cu experencia na Banco Mundial orador na ‘Aruba Sustainable Action Forum’

Expertonan riba intercambio di conocemento, cu experiencia rib’e topico aki na Banco Mundial, ta oradornan invita na ‘Aruba Sustainable Action Forum’.

E evento aki ta tuma luga diamars awo 21 di februari y e oradornan ta bay detaya e importancia di intercambio di informacion entre organisacionnan. E foro su obhetivo ta pa informa y alinia perspectivanan rib’e proceso di implementacion di ‘Metanan pa Desaroyo Sostenibel’ (SDG’s) di Nacionnan Uni na Aruba y tambe pa stimula partnership entre diferente sectornan.

 

Pa un implementacion exitoso di e SDG’s na Aruba ta importante pa e diferente sector traha hunto y intercambia conocemento y practicanan. Pa e motibo aki e Comision Nacional di Gobierno di Aruba, encarga cu e implementacion di e metanan mundial, ta pone atencion extra na e ‘Aruba Sustainable Action Forum’ riba intercambio di conocemento entre e diferente sector.

 

Sra. Barbara Bitondo y sra. Neesham Spitzberg ta e dos expertonan cu lo ta presente na e foro pa asina aki comparti nan conocemento y decada di experiencia cu nan tin cu Banco Mundial rib’e topico aki. Sra. Bitondo ta un experto riba intercambio di conocemento, specialmente den participacion colectivo y entre diferente organisacion.

Sra. Spitzberg ta un experto riba maneho di conocemento den organisacionnan y entre organisacionnan.

 

Aruba Sustainable Action Forum ta tuma luga diamars 21 di februari di 8:30am pa 12:00pm na Crystal Theater. E foro ta gratis pa tur interesado den e proceso di implementacion di ‘Metanan pa Desaroyo Sostenibel’ aki na Aruba. Pa participa por registra via email na sdgaruba@kabinet.aw.

Top