Exposicion ‘Cas di Madu’ awor na Stichting Monumentenfonds Aruba

Stichting Monumentenfonds Aruba (SMFA) ta celebra e inicio di un aña nobo yamando bon bini na e exposicion di ‘Cas Madu’ na e oficina di SMFA.

Den un atardi ameno cu invitadonan a haci apertura di e exposicion di e fotografo Claudius Daly cu a fotografia mas cu tres shen cas di cunucu na Aruba.

E exposicion a cuminsa aña pasa na BEAM den edificio di ex Botica Aruba na Steenweg. SMFA pa e ultimo añanan caba tabatin exposicionnan di arte caminda cu monumentonan ta e inspiracion pa e artista den nos sala di reunion.

Awor ta toca turno na e exposicion di ‘Cas di Madu’ di Claudius Daly.

Locual a cuminsa pa Claudius Daly manera un pasa tempo a bira un pasion pa e casnan di cunucu aki, cu manera sr. Daly ta bisa, nan ta recorda nos con duro nos grandinan a traha pa construi nan casnan y ta encanta con despues di añasnan e casnan ta fuerte para, aunke tambe lamentablemente tin hopi cu a bai perdi caba y of ta na peliger di desaparece.

SMFA semper ta apoya iniciativanan asina aki cu banda di ilustra e beyesanan di nos monumentonan na Aruba tambe ta yuda conscientisa tocante e situacion di hopi di e casnan aki p’asina stimula tur hende pa yuda preserva esakinan como parti di nos herencia cultural.

Publico lo por pasa na Stichting Monumentenfonds Aruba pa bishita e exposicion di dialuna pa diabierna entre 8:00am – 12:00pm y 2:00pm – 5:00pm.

Top