Famia di Shon Lang (dfm) ta masha contento y orguyoso cu dedicatoria di MFA Savaneta

Diaranson atardi varios miembro di famia van der Linden a haya un recorido di e instalacionnan, ainda den construccion, di MFA Savaneta.

E impresion na final tabata uno masha positivo y cu ta añadi n’e sentimento di orguyo cu ya caba e famia aki ta sinti pa cu e proyecto.

Manera a keda anuncia, Gabinete Mike Eman a dicidi cu e facilidad multi-funcional aki lo ta dedica n’e gran Savanetero Shon Lang van der Linden, den felis memoria.

Na final di e recorido a combersa cu Shon Lang su yiu muher, e conoci cantante Yolanda van der Linden, kende a expresa algun di su pensamentonan.

 

Oficina di Prome Minister Mike Eman pa medio di Ekipo di Maneho di MFA a extende un invitacion n’e famia caminda varios yiu y tambe nieto a asisti. Previo n’e apertura cu ta anticipa lo ta den luna di juli proximo, kier a mustra famia van der Linden con e Facilidad Multi-funcional cu lo carga nomber di “Cas di Shon Lang” ta bay y con e ta bay sirbi n’e pueblo di Savaneta.

 

‘E ta hopi bon; tur loke nan a splica nos mi ta haya hopi bon mes, pasobra ta loke pueblo di Savaneta tin mester,’ asina Yolanda a comenta.

Nan por a mira unda ta bin cu un biblioteca, un area cu podium caminda muchanan por presenta musica y tene hopi otro evento.

Tambe a indica unda ta bin cantina, sucursal di Belasting y diferente otro posibilidad di servicio. MFA’nan Noord y Paradera tambe a keda dedica na personahenan importante di e bario.

 

Den caso di Noord, e MFA a haya e nomber di “Cas di Titi”, na honor di señora Titi Tromp. Na Paradera, a dedica e MFA na memoria di difunto Mito Croes cu “Cas di Mito”.

Shon Lang van der Linden ta merecido di e honor aki paso el a dedica su bida na su bario y na musica.

For di chikito, manera su yiu mes ta conta, e tabata core paranda di aguinaldo y paranda di dande den december, y un di su pasionnan tabata musica ranchera.

E ta fundador di Mariachi Perla di Aruba y un hende cu a conoce Savaneta bon y tabata bon conoci den Savaneta tambe como un persona amabel y servicial.

 

Yolanda van der Linden ta splica cu ainda no ta tur hende sa cu ta dedica e facilidad nobo na su tata, pero esnan cu si sa ta haya e idea uno hopi bunita, esta cu un yiu di Savaneta ta wordo honra asina.

E idea di Gabinete Mike Eman semper tabata p’e MFA bira un parti central di e bario; no solamente den e servicionan cu ta ofrece, pero cu ta carga su esencia. P’esey a scoge a haci consulta cu e bario pa mira kico nan ta desea y tin mester, p’esey a busca un arkitecto di Savaneta den persona di Serge Thijsen y tambe e MFA su manager ta Kimberly Boekhoudt cu ta bin di e propio bario.

 

 

Yolanda van der Linden ta sumamente satisfecho y orguyoso cu e gesto aki. ‘E ta hopi hopi bon mes. Ami ta hopi contento, ya bo ta wordo honra como famia; e ta algo hopi grandi,’ el a bisa cu un sonrisa.

MFA Savaneta t’e di tres MFA cu ta drenta den operacion y despues ta bin tambe Santa Cruz, San Nicolas y Dakota.

 

Top