Famia, educacion y bienestar ta e tema pa Dia Internacional di Famia 2017

Dialuna, mei 15 ta Dia Internacional di Famia, manera decreta pa Nacionnan Uni desde 1996. Tema pa 2017 ta: “Famia, educacion y bienestar”

E aña aki ta focus rib’e rol di famia den sociedad, e maneho di Gobierno pa promove educacion di famia y tin aceso na bienestar. E atencion pa e dia ta tambe pa crea consciencia con importante ta pa muchanan haya educacion sano desde hopi chikito te dia nan bira adulto.

 

Un otro meta di Dia Internacional di Famia ta pa mustra gratitud na tur otro persona y organisacion cu ta yuda den educacion di mucha. Asina por pensa riba wela y welonan, famia cercano, bon bisiña y amigonan, instancia, fundacion y gruponan social.

Nan ta duna un man pa e famianan den un pais por tin bienestar. Ta bon tambe pa duna reconocimento na empresanan cu tin condicionnan di trabou cu ta sostene e famia dor di p. e. ofrece oranan di trabou flexibel of parttime. Tambe na empresanan cu ta duna hoben- y grandinan oportunidad pa keda activo den trabou p’asina por yuda nan famia.

 

Ta un dia cu nos por duna atencion den media rib’e importancia pa tin e conocemento adecuado pa promove un sistema di biba cu ta bon pa nos medio ambiente y ta sostenibel.

Na esnan cu ta guia famianan con pa comunica cu otro na un forma sano y respetuoso.

Con pa respeta e derechonan humano y promove pas y igualdad den cada famia y pais.

Y naturalmente na e instancia y personanan cu ta duna di nan tempo pa comparti nan conocemento.

 

Lo ta hopi bunita pa cada sector den comunidad duna atencion na e dia aki, esta e Dia Internacional di Famia. Di parti di www.comprondiendobida.com nos lo desea di wak tambe actividadnan special pa famianan den bario.

Tambe pa duna un cariño special na e famianan chikito di un solo persona. Hopi biaha nan ta hendenan cu ta biba den soledad. Duna nan tambe un man di aprecio, di hermandad y humanidad.

 

Feliz Dia Internacional di Famia di parti di www.comprondiendobida.com.

Top