Famia Farro di Sabana Liber feliz cu bishita y trabou di Prome Minister Mike Eman

Un di e casnan cu Minister President Mike Eman a bishita diahuebs ultimo durante e programa di Accion di Bario, tabata esun di sra. Teresita Farro, conoci cariñosamente como ‘Chita di Don Coy.’

Aki e mandatario a ricibi un bon bini masha caluroso, ademas di un combersacion ameno cu sra. Chita y su yiu muher Marcia.

Aki nan a expresa nan aprecio p’e manera con e mandatario ta yega serca di e ciudadanonan, pero tambe nan satisfaccion grandi p’e manera con Gobierno ta manehando e pais.

 

Sra. Chita a conta di e experiencia di su bishita bisando cu esaki tabata “hopi bon trankil y bunita.” Tambe a bisa con “a combersa un poco, mi a mustre kico falta. El a priminti nos luz cu nos ta bay haya.”

Esey ta un promesa cu a bira realidad e mesun anochi como parti di otro programa di Gabinete Mike Eman II, esta ‘Luz den Bario.’

Cayanan di Montaña y Seroe Janchi tambe a haya puntonan di luz publico e siman ey.

 

Marcia Farro, sra. Chita su yiu muher ta comparti e sentimento di su mama. “Mi ta full out cu Minister Mike Eman. E ta pasa su mes den e bario pa papia cu e hendenan y asina e ta mira kico t’e necesidadnan y ta traha riba nan.”

E ta indica cu e si ta mira hopi cos di Aruba cu a bay dilanti dunando como algun ehempel e edificionan cu a wordo restaura y awor luz y cayanan cu a traha.

 

Refrieiendo n’e maneho di Gobierno, a sigui bisa: “Ami si ta kere cu e ta un bon direccion. E ta traha p’e hubentud. Mi ta wak cu esnan poni pa haci e trabou, bo ta mira e cambio y hopi a bay dilanti. Den tur tereno mi a mira baymento dilanti. Ami si ta contento.”

Prome Minister a gradici nan p’e sosten y a renoba su compromiso cu nan di sigui traha pa  bienestar y progreso di Aruba.

Bisando ayo pa sigui den e ruta di bishitanan riba e diahuebs mainta, sra. Chita a expresa na Prome Minister Eman: “Danki p’e bishita y mi ta hopi contento cu e bishita y sigui traha asina pa Aruba.”

 

Top