Famia y amistadnan den consternacion na De Vuyst – Un hoben a bin haya su ruman morto den baño

 

Probable caso di asesinato

 

For di den oranan di merdia Aruba ta den shock cu un caso di asesinato cu a wordo cometi na De Vuyst San Nicolas. E victima ta un hoben deportista di 19 aña y mama di un mucha homber di 3 aña.

Despues di mas o menos 1’or di merdia alarma ta wordo bati na Polis pidiendo presencia urgente di patruya y ambulance pa un caso straño na e casnan di FCCA di dos piso na De Vuyst.

E informa ricibi ta indica cu un mucha a yega for di scol y a topa cu su ruman muhe den un posicion cu ta mustra cu algo serio a pasa y cu e no ta dunando señal di bida. Mesora e hoben a core bay na bisiña pa bati alarma cerca autoridadnan.

Informacionnan no confirma ta bisa cu e hoben aki a wordo haya den baña sin ningun paña bisti y su man- y pianan tabata mara cu waya di coriente mientras cu riba su cabes e tabatin un saco di plastic. Ambulance a yega na e sitio, pero a mira cu e no tin señal di bida pa cual a pidi presencia di dokter y asina un rato despues dr. Giel a constata morto.

E informe acumula ta mustra cu e mucha muhe aki ta un hoben bon conoci, esta Sarahy Esther de Los Angeles Sierra. AE ta naci dia 10 di september, 1998. E ta mama di un mucha homber di 3 aña y e mes ta practica deporte, segun por a compronde atletismo y volleyball.

Ta parce cu na e momento di e sucedido e tabata su so na cas. Ta wordo pensa riba e hipotesis di kiebro y robo. Kisas e hecho aki a sosode mas tempran, pero autopsia lo mester bay determina cuanto tempo e tin morto caba. Por ta e ladron (nan) a drenta e cas, keriendo cu no tin niun hende y ora cu el a sorprende nan, kisas personanan cu e famia conoce, pa miedo a dicidi di kita bida di e hoben aki. Ta pensa den e direccion aki pasobra si ta personanan desconoci, e no ta core riesgo di wordo identifica pa cual no tabata necesario di comete e crimen.

Pero tin mas version ta circula di kico por a pasa, pero como cu ta asunto basta serio, mester laga mas detaye bini dilanti.

Autoridadnan policial ta papiando cu tur bisiña, ta buscando pa mira si tin algun camera den e bisindario, of si tin personanan cu pasando den e area ey den oranan di merdia a mira of tende algo straño.

For di momento cu a bati alarma, autoridadnan a cera henter e area pa investigacion. Pa e famia tabata hopi dificil di yega y haya nan ser keri den e estado cu nan a lague atras. Y mas ainda te cu den oranan di anochi ainda e curpa no a wordo transporta, ya cu mester recoge mas tanto dato posibel di  na e sitio di crimen.

Autoridadnan ta haci un apelacion na cualkier persona cu por a mira algo of a tende algo relaciona cu e sucedido aki pa tuma contacto cu e tiplijn 11141.

Na famia, amigo y amistadnan di Sarahy nos ta manda nos mas sincero palabranan di condolencia.

Leave a Reply

Top