Federacion di Ahedres Aruba ta organisa Copa Himno y Bandera 2017

 

E fin di siman benidero Federacion di Ahedres Aruba (FAA) ta organisa su torneo tradicional Copa Himno y Bandera. E torneo aki ta cay bou di e torneonan di fin di siman (torneo nacional) cual ta conta pa rating y tambe pa puntonan di FAA.

 

E Copa Himno y Bandera 2017 lo ser hunga na clubhouse di FAA cual ta ubica na Nieuwstraat 11. Lo tin 3 diferente categoria: Open, U-18 y U12.

Inscripcion lo tuma lugar riba diamars 15 di maart 2107 entre 7:00pm – 9:00pm na clubhouse di FAA. Inscripcion pa miembronan di FAA ta Afl. 10,= pa e categorianan U-12 y U-18, mientras cu miembronan cu lo hunga den e categoria Open lo mester paga Afl. 15,=. Inscripcion pa esnan cu no ta miembro di FAA ta Afl. 25,=.

 

E categoria di U-12 lo ser hunga riba diasabra dia 18 di maart y e torneo lo consisti di 7 buelta. Pa wega cada hungador ta haya 15 minuut. Prome buelta lo cuminsa pa 9:30am y e ultimo buelta lo ser hunga pa 1:30pm, mientras cu entregamento di premio lo tuma lugar entre 2:30pm – 3:00pm. Lo tin trofeo pa e prome tres lugarnan di e hungadornan masculino y trofeo pa e prome tres lugarnan di e hungadornan femenino.

 

E categorianan Open y U-18 lo ser hunga riba diabierna 17, diasabra 18 y diadomingo 19 di maart y lo hunga un total di 5 buelta. Pa wega cada hungador ta haya 1 ora y 15 minuut y lo haya un ‘incrementing time’ di 30 seconde pa movida.

Apertura lo tuma lugar di 7:45pm – 8:00pm diabierna dia 17 di maart y despues e prome buelta lo ser hunga di 8:00pm – 11:30pm. Diasabra dia 18 lo hunga buelta no. 2 di 3:00pm – 6:30pm y buelta no. 3 di 7:00pm – 10:30pm. Diadomingo dia 19 di maart lo hunga buelta no. 4 di 10:00am –1:30pm y e di 5 y ultimo buelta lo ser hunga di 2:00pm – 5:30pm. Entregamento di premio lo tuma lugar entre 5:30pm – 6:00pm.

Pa Categoria di U-18 lo tin 3 trofeo pa e prome 3 lugarnan, mientras cu lo tin un medaya pa e miho hungador di e categorianan inoficial U-16 y U-14. Den Open e prome tres lugarnan lo gana trofeo.

 

Federacion di Ahedres Aruba kier a invita tur su miembronan y interesadonan pa bin hunga y/of bishita e Copa Himno y Bandera 2017 na su clubhouse durante e dianan 17, 18 y 19 di maart. Alabes FAA kier a gradici Comision di Subsidio/Lotto pa Deporte pa na aporte financiero cu ta haci e torneo aki posibel.

Top