FIFA a keda impresiona cu desaroyonan den futbol na Aruba

E siman aki, entre 17 pa 19 di januari ta tumando lugar e “FIFA Executive Football Summit” na Miami, na Merca. Tanto Presidente di Arubaanse Voetbal Bond, esta Richard Dijkhoff como tambe e Secretario General interino ta atendiendo e cumbre aki, hunto cu un lista largo di otro pais participando.

Durante e cumbre, Presidente di FIFA a presenta su vision pa futuro, cu e titulo “FIFA 2.0” mientras cu a probecha pa elabora riba crecemento di wega di futbol, e futuro di desaroyonan den e deporte rey.

Manera ta haciendo na Aruba tambe ultimo aña, na nivel di FIFA a dedica un bon rato riba e tema delicado di transparencia, dunamento di cuenta, cooperacion, servicionan, educacion y con ta midi progreso y exito den futbol.
Cu tur e paisnan miembro presente, a presenta e formato di e campeonato mundial di futbol FIFA 2026. Aki a para un rato na desaroyonan tecnico y di hubentud, pero cu e tema special pa promove mas futbol bao di mucha muhenan.

FIFA a presenta nan “Forward Program” na paisnan miembro, cu un splicacion masha amplio di con ta yega na fondonan disponibel den cuadro di e programa di progreso y desaroyo aki.

Claro cu tur donacion ta bay man den man cu un lista di rekisitonan y formula pa midi si e programa a logra e obhetivo.
Presidente di AVB, Richard Dijkhoff a haci un presentacion di e logronan di AVB den e ultimo 3 añanan. Paisnan miembro presente a keda masha asombra y despues di e presentacion varios a acerca e representantenan di Aruba cu peticion pa splica mas con a logra tanto cambio, tanto desaroyo y tanto programa na mes momento asina.

Tanto e ehecutivonan di FIFA como tambe CONCACAF tabatin bon palabra pa AVB y na mas cu un ocacion a uza “Aruba” como ehempel den e otro presentacionnan.

Top