Filosofia di partido AVP: “Aruba por wel di zink numa, basta nos famia y amigonan di AVP keda bon para” Segun partido MEP

Poco poco pueblo Arubano mes ta testigo con un gran parti di e miembronan di fraccion di AVP ta briya pa nan incapacidad y actitud mediocre den Parlamento y un di nan sigur ta e Parlamentario Clarisca Velasquez, kende siman pasa manera un flie sin rabo a core defende e proyecto corupto di Green Corridor.

Y esaki na momento cu Parlamentario di MEP, Dangui Oduber a habri e beerput y trece padilanti henter e maniobranan coruptivo cu a ser utilisa pa pasa e proyectonan di Green Corridor y Watty Vos Boulevard di un man pa otro y caminda miyones di florin di placa di pueblo ta bay den saco di esnan cu nunca a traha na interes di e pueblo di Aruba.

 

Un tutu completo

Den su comunicado di prensa Clarisca Velasquez a alega cu su fraccion di AVP – manera pushi ta wak su cara den spiel – a bay DOW pa haya informacion di e proyecto di Green Corridor, pero e pober no sa cu e hefe di DOW mes algun luna pasa publicamente a distancia di e proyecto aki, a laba su man y a tira tur e responsabilidad rib’e compania di construccion Odinsa y kende na su turno a hisa benta y tira e proyecto den man di un otro compania internacional. Pues un tutu completo y esaki cu bendicion di e Gobierno di AVP.

 

Proyectonan PPP di 90 miyon

Sinembargo locual a haci falta den henter e defensa pober y mediocre di Clarisca Velasquez ta e hecho cu na ningun momento so e no a splica pueblo kende, con y cuanto lo paga tur aña na e proyectonan di Hospital, Green Corridor, Watty Vos Boulevard y edificionan MFA.

Aki ta papia di un suma total di 87.7 miyon florin cu tur aña mester paga pa e proyectonan PPP ora cu esakinan termina na 2017/2018.

Pero te cu awe ningun gobernante di Gabinete Eman, ningun Parlamentario di AVP/POR, ningun instancia manera Banco Central, AIB y ni CAFT por splica pueblo di unda ta saca e suma di casi 90 miyon florin tur aña pa paga pa e proyectonan aki y esaki pa 25 aña largo.

Na lugar di haci co’i caweta di wak tur dia cual Parlamentario ta traha of lag’i traha, lo ta bon pa Clarisca den su proximo comunicado splica pueblo esaki!

 

Interes di 215 miyon

Alabez Clarisca no mester lubida cu pueblo ta horca caba cu pago di interes di e Megadebe cu AVP a hinca nos pais aden y cual ta suma na mas cu 215 miyon florin pa aña.

Si Clarisca ta un tiki consciente, e mes por decifra cu den total mas cu 300 miyon florin na pago di interes y di e proyectonan PPP lo bay come den nos presupuesto nacional y cual ta 25% di nos entrada nacional. Y ainda Clarisca tin e curashi pa sinta alaba su Gobierno pa proyectonan cu no ta ningun prioridad na e momento aki?

 

Sin duda cu e pago di e extra debe di 90 miyon florin tur aña na e proyectonan PPP desde 2018 padilanti lo bay afecta nos situacion financiero severamente y cu finalmente tur sector den nos comunidad lo ser afecta, manera nos enseñansa, nos salubridad publico y nos siguridad cu lo sigui sinti falta di e inversionnan necesario. Pero esaki nunca tabata e preocupacion di e partido cu Clarisca ta defende ciegamente, ya cu nan filosofia semper ta “Après nous le deluge”, esta cu Aruba por wel di zink numa, basta nos di AVP y nos amigo y familiarnan keda bon para.

Top