Fiscal a pidi 22 luna pa acusado di maltrato, menasa, posesion di droga y incubrimento

Siman pasa a presenta dilanti mesa berde e homber G.J. Kelkboom, kende tabatin un serie di acusacion contra dje y di cual durante tratamento di e caso e representante di Ministerio Publico a agrega uno mas aserca.

  1. a wordo acusa di menasa un persona cu morto (no di intento di asesinato), den e period di 23 di juli 2017 te cu prome di augustus 2017. Na e occasion ey e lo a expresa e siguiente palabranan: “H…. cumi y mi ta manda boso shelo”; e ta wordo acusa di intencionalmente y cu premeditacion di a dal e persona aki (su amiga) varios biaha cu mokete den cara y na su curpa riba 23 di juli, 2017; e ta wordo acusa di posesion di hennep den e period di 7 pa 10 di augustus 2017 y riba 11 di mart 2017; tambe di posesion di balanan den e period di 7 pa 10 di augustus, 2017; e ta wordo acusa di tabatin den su poder dos brommer, den e period di 26 di juni pa 10 di augustus 2017, y cualnan e mester por tabata sa cu nan ta procedente di un crimen (horta na Hulanda).

E problema tabata cu su amiga pero cu a sali for di man riba un anochi cu el a bebe masha hopi mes. E acusado a splica Huez cu e no tin problema cu su amiga ta sali bay dal drinks, ya cu e sa hacie caba, pero e problema ta, segun e ta bisa, cu e muhe no ta contesta su yamadanan ora cu ta sali. Riba e dia en cuestion el a maltrata y menasa e muhe, y esey e ta admiti tambe. “Mi no a dale un mokete pero cu cantiman y el a bay atras dal den rand di e cama,” e acusado a splica. “Mi no tabata sa cu mi tabatin asina hopi forsa,” el a splica.

Na diferente ocasion el a bisa Huez cu e no tin ningun problema cu e muhe ta sali, pero e tin problema cu e muhe ta perde y ni su mensahenan e no ta contesta. El a nenga cu el a maltrata e muhe anochi, pasobra e no a keda warde na e apartamento. E mes a bay bishita su yiunan y despues a sigui trip y na momento cu e tabata bayendo cas casi mainta, el a dicidi di pasa na e apartamento pa wak si su amiga a yega cas. Eynan e problema a cuminsa.

Pa loke ta e droga, e ta bisa cu e marihuana ta di dje y ta uza esaki. Den un auto bieu tambe autoridadnan a haya cocaina y esey e no sa di kende e ta. “Berdad e auto ta dimi, pero e ta para eynan hopi tempo. Tin hopi hende ta bini mi cas, ademas di mi famia, y cualkier persona por a sconde eyden,” el a bisa Huez. Y riba dje, ta algun dia prome cu tratamento di e caso, Polisnan a mustre foto di e droga lora den un flanel oranje.

E balanan cu a wordo haya na porta di un apartamento pafo di e cas di su mayornan, e ta bisa cu e no sa di nan. Kisas, el a bisa, e por ta bala relaciona cu un caso anterior cu e tabata envolvi den dje mas cu 5 aña pasa. Pero awor e sa cu e no tabatin bala den su poder.

E brommernan el a cumpra for di un persona cu ta trece nan for di Hulanda den container y ta pasa e tramite normal via di Aduana. E hecho cu nan ta un tiki mas barata, no a pone pensa niun momento cu nan ta procedente di robo.

E acusado ta traha cu su mama den un negoshi chikito cu ta brinda tour na turistanan y e tin 6 yiu.

Fiscal a haya e acusacionnan contra dje proba, inclusive e casi 1 kilo di cocaina haya den un auto bieu para pafo di e cas unda cu e ta biba. Den e caso di e balanan si Fiscal a pidi pa declar’e liber pasobra no por a proba cu nan ta di dje. Pa e acusacionnan cu si a keda proba Fiscal a pidi pa Corte impone un castigo di 22 luna incondicional. Si a bisa cu mester entregue bek e brommer Hayabusa.

Dia prome di december tin sentencia den su caso.

Leave a Reply

Top