Fiscal a pidi un castigo di prison di 10 aña

Ayera mainta Corte di Husticia den Prome Instancia a cuminsa cu tratamento di e caso, di asesinato di Richard Fingal, kende tabata Director di Serlimar. E tratamento aki a tuma sigur un dia y asina mes, no a keda cla.

 

Pa Ministerio Publico e caso aki ta conoci como caso Chabela, esta, e morto di Director di Serlimar, Richard Fingal.

Fiscal di Ministerio Publico a demanda castigo di 10 aña di prison, mientras su abogado a demanda libertad inmediato, ya cu aki ta un caso di defense propio.

 

E Chinees sospechoso a bay masha den detayes con el a mata Richard Fingal, kende a haya un total di 23 hinca, y tabatin 4 corta masha profundo na su curpa.

Ayera mainta, e Fiscal a adapta su acusacion. Berdad el a acusa e dama Chinees pa asesinato, manera poni riba e rol y asesinato t’e aspecto di premeditacion.

 

Pakico el a adapte? Pasobra tin ainda e informacion cu NFI a saca for di telefon di e victima y cu mientrastanto a yega Aruba bek, pero ainda tin cu wordo analiza (cu tabata e razon tambe cu eigenlijk Fiscal tabata kier pa Huez pospone caso.

E informacion aki no a forma parti di loke a wordo trata ayera, pero ta posibel cu for di e analisis ta sali elementonan cu ta indica premeditacion.

 

Fiscal a pidi Huez pa rechaza e apelacion riba noodweer of noodweerexcess. E sospechoso no a duna eigenlijk motibo of splica e razon pakico e victima mester a muri.

Tabata obvio cu e MESTER a muri, pero dicon? E no a merece, no p’e supuesto avanzenan indesea cu e lo a haci, manera e sospechoso ta bisa.

 

Richard Fingal a muri un morto horible cu heridanan na su pecho, barica y brazanan. E lugar tabata cubri cu sanger.

Fiscal a mustra video unda ta mira e porta di glas sacudi, cu tabata e momento cu e victima a ranca e porta cu forza pa purba habri’e.

Richard Fingal a sufri hopi prome cu el a muri y a sclama pa su bida (testigonan a tende ta yora: “Mi famia! Mi famia!” y tambe ta grita pa yudanza), pero e sospechoso no a tene compasion y piedad cu ne.

 

Loke no a bin na claridad, pakico te motibo cu Richard Fingal  “mester a muri”.

Mirando e manera con e sospechoso a keda hinke y corte y sigui su tras, bo lo por bisa cu ja… e lo no a sosega te cu el a schakel Fingal uit totalmente.

No ta conoci tampoco si  a laga e sospechoso haci un psychologische/psychiatrische test, aunke normalmente e mester wordo haci.

 

No lubida cu e victima a ser busca p’e propio dama Chinees, y hunto nan a bay na Piedra Plat, pero….kico a pasa eyden cu a conduci n’e hincamentonan mortal aki, a keda  te ainda un interrogatorio.

E sospechoso a bisa cu loke a sosode tabata cu mientras e tabata dunando Fingal un facial, di ripiente el a cuminza bise cu e ta guste. E Chinees a sinti’e incomodo mes y a haci e tratamento di facial mas cortico p’e keda cla mas liher.

Na un dado momento el a bira bay na un cashi y Richard Fingal a bula lanta for di e cama y a braze, a cuminza fules, papia cosnan sexual den su orea, tene su mannan tras di su lomba y purba pushe riba e cama. Tur esaki segun e sospechoso.

Richard Fingal mes no tey mas pa bisa nos kico a pasa. Dead man don’t talk!!

 

Segun e muher Chinees el a dal e victima cu su elleboog y e victima lo a dal’e duro den su lomba y pushe dal’e cu su frenta den muraya. Imposibel, segun Fiscal, mirando cu e no tabatin ningun marca na su curpa, otro cu un rasca chikito na su man.

E tabata si cubri cu sanger, pero di e victima. E unico lugar unda e no tabatin sanger tabata rond di su boca y nanishi, unda e tabatin e capa di boca bisti.

 

E Chinees a bisa durante intrerrogacion na Polis na inicio di e investigacion cu mientras cu e victima tabata tene, el a rek den cashi y a coy dos cuchio, di cual uno ta skerpi-skerpi. Un a cay. Cu e otro el a hinca e victima den su garganta of pecho.

E grip a los un tiki e ora, pero e victima a sigui tene y el a hinke un biaha mas na su barica of na banda.

Djey el a sigui. Tur cos a caba ora cu el a dal e victima cu un martiu cu forza na su frenta y a hinke cu cuchio den pecho, despues di cual el a finalmente bay pafor, unda a yega hende, e.o, doño di e lugar, etc. etc..

 

Importante ta cu di tur manera e parti di investigation di e telefon ta sigui, asina mes Huez a laga sa cu dia 21 di april awor, e lo duna su veredicto.

Esaki ta prome parti di e caso, pero ta nos intencion pa bay mas detaye riba e tratamento di e tratamento aki den Corte di Husticia, pa cual sigur tabatin masha interes. Hopi pregunta te ainda a keda sin haya un contesta.

Top