FMSA su CAO ta aproba! Fuels Marketing & Supply Aruba N.V. y IOWUA den un relacion p’e siguiente 4 aña

Siman pasa a tuma lugar negociacion pa un CAO nobo cu tabata sumamente exitoso p’e compania estatal Fuels Marketing & Supply Aruba N.V.

Durante 5 dia a tuma lugar e negociacion intensivo pa un CAO nobo mirando cu esun anterior a yega su final na mei di e aña aki.

“E negociacion a bay den un ambiente hopi ameno. Nos tabata hopi transparente cu otro caminda nos a brinda e sindicato informacion nan specifico referente nos compania”, Gina Maduro HR, Training & Development Manager di Refineria di Aruba N.V. ta splica.

 

For di 1 di october 2016, e departmento cu antes tabata resorta bou di Refineria yama Valero Marketing & Supply Aruba a converti den un compania estatal cu e nomber Fuels Marketing & Supply Aruba N.V.

Na aña 2014, IOWUA a sera e ultimo CAO cu Valero Refinery p’e trahadornan cu tabata resorta bou di Refineria.

E cambio di mas grandi awor ta cu a enfoca riba e compania estatal enbes di e Refineria.

E CAO a conoce cambionan structural y den formato. Adicional a percura pa simplifica e lenguahe di e CAO p’asina un y tur por compronde e contenido un poco mihor.

 

Sr. Tito de Cuba, un experto den leynan laboral di Aruba y HR Consultant den region, a keda aserca pa RdA pa forma parti di e negociacion y tabatin un rol crucial.

Sr. Tito de Cuba ta comenta cu un CAO ta un instrumento p’e trahadornan, unda ta stipula nan derechonan y tambe nan obligacionan.

“Locual pami a resalta den e negociacion aki t’e sinceridad y comprension di ambos partido pa yega na un meta cu lo beneficia tanto e empleadonan como FMSA”.

 

Durante e ultimo dos dianan a concentra riba e programa y beneficionan di e trahadornan, unda tambe a haci diferente ahuste.

Di parti di IOWUA sr. Boy Anthony ta splica cu a pone enfasis riba e beneficionan secundario y tambe riba oportunidad pa futuro.

Por ultimo a discuti e salarionan, unda a tuma den consideracion cu ta trata aki di un compania nobo.

 

Diabierna mainta pa 11or, a yega na un acuerdo caminda e miembronan di IOWUA a vota na fabor di e CAO nobo.

A concretisa esaki na momento cu tanto e team negociador pa FMSA acompaña pa sr. Tito de Cuba y representatenan di IOWUA a firma e CAO cu tin un valides p’e siguiente 4 añanan. Alexander Hoek, Operation Superintendent di FMSA, John Daal Aviation Supervisor di FMSA y Gina Maduro HR, Training & Development Manager di RdA, ta forma parti di e team negociador, acompaña pa sr. Tito de Cuba y representante di IOWUA den persona di sr. Boy Anthony.

 

Sr. Boy Anthony ta finalisa bisando: “Tabata un placer di por a forma parti di e negociacion cual t’e prome biaha hunto cu e team di RdA. E cooperacion a crea un situacion al estilo win win y por spera un bon relacion di trabou den futuro entre RdA, FMSA y IOWUA”.

Top