For di algun dia adelanta, tur centro di control aereo tabata debidamente na altura di suspension di servicio na Aruba Airlines

Hopi hende ta kere cu loke cu a pasa cu Aruba Airlines, ta un acto di represaya di parti di Centro di Control di Mahuma, yama awor Dutch Caribbean Air Navigation Service Provider, cu ta duna servicio na e.o. tur avion cu lanta of baha na Aruba.

Na di esey ta berdad, pero ta Aruba Airlines a keda sin cumpli cu palabracionnan haci pa cu su obligacion financiero.

 

Pa evita malentendimento, e autoridad di DCANSP, sra. Micilia Albertus-Verboom a splica ta kico a pasa exactamente cu Aruba Airlines, cu a haya un suspension y como tal a nenga di duna Aruba Airlines e servicio cu mester.

DCANSP tin un acuerdo cu pago cu Aruba Airlines, pero nan  no a cumpli cu dicho acuerdo. No ta prome biaha, pero esaki ta di dos biaha caba.

Como tal DCANSP a saca un AIC, cu nifica un Aeronautical Information Circular for di siman pasa diarazon, unda a bisa Aruba Airlines, si pa dialuna ultimo nan no cumpli cu nan pago, lo suspende e servicio cu un avion mester pa e.o. pasa den espacio aereo controla pa DCANSP.

Y esey a tuma lugar.

 

A surgi e pregunta, p.e. con bin cu autoridadnan di Aviacion Civil di Miami a permiti Aruba Airlines di lanta buelo tog, si nan tabata sa cu DCANSP a suspende e servicio di control aereo. Riba esaki, Micilia Albertus-Verboom a reacciona, e compania, esta Aruba Airlines ta debidamente na altura di e suspension y asina tambe tur centro di control aereo tabata na altura di e decision tuma. Pesey DCANSP no sa pakico a laga e avion di Aruba Airlines lanta buelo tog.

 

Ora cu Aruba Airlines a cumpli cu pago, DCANSP a anula e AIC y asina e avion por a drenta espacio aereo di Corsou y por a baha na Aruba, sin novedad.

Hecho ta cu asina cu un compania no cumpli cu su obligacion financiero IATA ta manda un reminder, 2 pa 3 biaha, despues di cual DCANSP ta tuma over, avisando e compania di su debe.

Si nada sosode, e compania lo haya un di dos carta y si ainda nada sosode, abogado ta tuma over.

Na momento cu DCANSP a ricibi pago di Aruba Airlines, a habri espacio atrobe y asina e buelo a baha sin novedad na Aruba.

 

 

 

Top