Formador a informa Gobernador riba formacion – Ainda ta den negociacion riba Ministerionan

Diaranson un poco prome cu 12’or di merdia Formador Evelyn Wever Croes a bishita Gobernador Alfonso Boekhoudt riba desaroyo di e proceso pa yega na formacion di un Gobierno nobo.

Loke cu a resalta den e declaracion cu el a duna na prensa pafo y contestando pregunta ta cu no tin un Gobierno ainda, apesar cu a yega na un acuerdo riba diferente tema caba, pasobra ainda falta e reparticion di carteranan. “Nos ta den e proceso final si caba unda nos ta tratando e parti di reparticion di cartera y apuntacion di e candidatonan pa bira Minister,” el a bisa para dilanti oficina di Gabinete di Gobernador.

El a informa Gobernador cu e proceso ta canando y a sigur’e cu ta yegando e parti final. “E luz na final di e tunnel ta na bista. E ta cuestion di algun rato so mas,” el a bisa. Si logra keda cla cu algun detayes, nan lo por tin un Gobierno nobo pa diabierna. Di otro banda el a bisa, den e fase aki di formacion e ta depende hopi di otro instancianan. Por ehempel, e proceso di screening ta tuma luga a base di un Landsbesluit  cu ta stipula e minimo cu Formador mester haci pa cumpli cu e condicion aki. Algun di nan ta encera cu mester haya documento y informacion di otro departamentonan. “Si nos keda cla cu esaki, e ora mi por finalisa mi rapport pa Gobernador. Despues di esaki inmediatamente por anuncia con e Gobierno ta hinca den otro y regla e asunto di huramentacion. Ohala cu pa diabierna e por sosode, pero na mas cu un ocasion mi a duna un “planning” y nos no por a cumpli cune, pesey mi ta masha cauteloso pa papia di un fecha.”

E ariba menciona ta motibo cu Formador no por divulga nomber di ningun persona cu por ta esnan cu ta bay carga responsabilidad como Minister.  Cuanto Minister cada partido lo haya ta un di e temanan cu no tin un acuerdo final ainda riba dje. E parti di negociacion cu falta lo determina cuanto Minister ta bay tin y cuanto puesto y cual Ministerionan cada partido lo haya. “Mi no por a duna Gobernador informacion riba esaki ainda. Tene cuenta cu ora mi informa Gobernador, e mes tin su responsabilidad tambe. Mi no por sali  bisa kende nan ta, pasobra Gobernador mester di su espacio pa haci su tarea den e parti aki. Ora e ta cla, nos por duna e informacion ey.”

Ora cu a papia di e cantidad di Ministernan, el a bisa nan ta papia di 7 pero ora cu ta papia di tira awa den biña,  mester tene cuenta cu diferente aspecto.

Leave a Reply

Top