Formador Evelyn Wever Croes: Supervision financiero ta bay keda

Na su salida di un bishita cu Formador Evelyne Wever Croes a haci na Gobernador Alfonso Boekhoudt, el a bisa cu e supervision financiero ta bay keda existi. “Mescos cu nos ta biniendo cu Camber di Integridad pa garantisa integridad, un instituto manera Begrotingskamer, un instituto financiero pa garantisa un finansa publico sano ta necesario y nos ta bay keda cu e supervision financiero,” Croes a bisa.

E deseo ta, el a sigui splica, ta cu pa un dia por bisa cu CAFT manera el a wordo impone door di Hulanda no mester di dje mas, ya cu nos tin nos propio Begrotingskamer cu tin tur garantia manera CAFT. E intencion no ta cu e Gobierno nobo ta yega kita CAFT.  E motibo ta cu Aruba tin problemanan financiero masha grandi mes y “na e momentonan aki nos mester di cooperacion di Hulanda. Nos no ta bay cuminsa goberna cu un confrontacion cu Hulanda.”  Despues si lo bini cu e Begrotingskamer cu lo tuma e tareanan cu aworaki CAFT tin.

Pa loke ta e ley di CAFT, unda ta menciona den e normanan cu por bay na un deficit di 5% y cu pa otro aña mester tin un surplus di 5%, “esakinan ta cosnan cu lamentablemente mi tin cu bisa cu mi no ta kere cu nos lo bay logra.” El a splica cu el a haya un presentacion di Finanza unda por a constata cu tin un deficit di 50 miyon florin y tin tur indicacion cu e lo bira 50 miyon mas (total 100 miyon), cu ta yega asina na un deficit di 10%. No tin ningun manera pa e wordo baha. Esaki ta haci cu “nos tin un problema hopi serio den e situacion financiero cu ta pone cu nos tin cu bay Hulanda. Nos tin cu bay Hulanda pa haci un apelacion riba nan sentido di cooperacion pa yuda nos sali di e situacion aki. Nos no ta bay bisa Hulanda cu nos no kier cumpli. Esey no t’asina. Pero ta importante pa Hulanda coopera cu nos y duna nos poco espacio.”

E suma di deficit di 195 miyon, Formador a bisa, no ta algo cu e pueblo por bay scupi di un dia pa otro, via medidanan. Di otro banda e no ta kere cu Hulanda lo pone cuchiu na nan garganta, ya cu si esaki sosode lo “recorda Hulanda cu nan ta co-responsabel pa e situacion aki. Hulanda pa 8 aña largo a permiti e Gobierno cu ta demisionario awo hinca e pais den debe, cu tur e gastonan cu nan a haci, cu un supervision di CAFT desde 2014. Asina mes e gastonan ta hopi mas halto cu ta permiti. Mi no ta kere cu Hulanda no por asumi e actitud di pone cuchiu na garganta.”  Evelyne Wever Croes a bisa cu e tin hopi confiansa cu Hulanda lo yuda, y pa logra esaki ta formando un ekipo cu e miho hendenan cu por duna e mensahe via un plan serio. Yega Hulanda man bashi no ta yuda. E meta ta un situacion financiero Hulanda y e tin confiansa cu lo convence e Gobierno di e pais aki.

Leave a Reply

Top