FPV Aruba ta tene e prome evento di drone race riba veld di SV Universal

Diadomingo, dia 19 di maart, FPV Aruba hunto cu Club SV Universal na Pos Chikito ta tene e prome evento di drone race aki na Aruba.

Riba e veld di e club ta traha un track unda esnan cu ta bula race drones por haci nan maniobranan y mustra loke nan por riba e tereno aki.

Ta bay tin un premio p’e ganador absoluto y tambe p’esnan cu termina na di dos y tres lugar. E evento ta wordo guia dor di e piloto di drone race profesional Vince Irie, kende ta na Aruba pa un siman.

 

Vince a caba di bin di Turkia unda el a participa den un evento di drone race di e liga nacional di Turkia y a termina den e finalistanan.

Otro siman Vince ta bula bay Malta unda e ta participa den e drone race event eynan. Diadomingo ta percura pa prome cu e race cuminsa tur hende por test e track pa los nan dedenan y custumbra cu e track.

E ta bay ta algo fun y Vince tey pa duna splicacion di e reglanan y di e track cu e mes hunto cu amigonan ta traha special p’e ocasion aki.

 

E lo guia tambe e evento special aki cu ta tuma lugar pa prome bes na Aruba. Tur hende cu ta bula drone (race drones) y kier midi forsa cu otro, ta mas cu bon bini pa participa n’e evento aki.

Vince Irie tey riba veld for di tempran, pero e wega mes ta start pa 5or di atardi. Lo tin snacks, bebida y musica. Tur entrada ta pa yuda SV Universal cu mester di un sosten financiero. Vince, descendiente di Pos Chikito ta organisa e evento den forma gratuito pa yuda e club di e forma aki. Bin abo tambe duna bo sosten.

 

Leave a Reply

Top