Fraccion di AVP: Andin Bikker a cambia di partido, pero no a cambia su frustracion politico

Ora cu Andin Bikker a bandona fila di MEP y a lanta su partido Democracia Real, e miembro di Parlamento aki a haci esaki, ya cu e no tabata kere den e vision di e partido geel mas.

Algun luna atras Bikker a dicidi di bandona su propio partido cu el a lanta, ya cu el a mira cu e vision di e lider actual di e partido nobo POR, tabata mihor cu su vision y Andin tabata dispuesto pa sacrifica su vision politico, pa loke e ta considera un ‘mihor’ vision politico.

 

Sinembargo ora cu tuma nota di algun declaracion di e ex lider di PDR y number dos di POR den prensa caminda e ta bisa cu ‘desde juni 2014 nos pais ta sin gobernacion,’  por ripara cu e mentalidad politico geel cu cual el a lanta cune, ainda ta sigui existi serca su persona, segun partido AVP.

Hasta un ciudadano cu por tin problema di visibilidad lo ta bon na altura di e desaroyo cu e isla a pasa aden desde 2009, ya cu su famianan mas serca di dje, lo splica na dje tur loke nan ta mira ora nan subi caya y core rond Aruba.

 

Desaroyo y progreso den tur bario, un economia stabiel y un turismo cu ta sigui florece, pero aki e frustracion politico di e ex lider di PDR t’asina grandi, cu e no por mira e realidad cu e kier sconde y pensa otro, pensa mas positivo.

Por no ta tambe cu sr. Andin Bikker ta mustra un falta grandi di memoria ya cu ta dos siman pasa Minister Presidente Mike Eman tabata den un reunion publico di Parlamento y cantidad di otro reunionnan mas, entre otro pa presupuesto 2014, 2015, 2016 y 2017 y lo ta dificil pa kere cu Bikker no a mira Premier Eman den sala of a scucha su persona contesta preguntanan haci na su persona.

 

Andin Bikker ta papia cu dor di mal gobernacion a impone CFT aki na Aruba, mientras cu ta Andin Bikker hunto cu fraccion di MEP a bay rond c’un delegacion di CFT na 2015 brasando presencia di e comision aki na Aruba.

Recientemente CAFT a duna su relato pa loke t’e maneho di presupuesto di Gobierno caminda un biaha mas a mustra cu Gobierno a cumpli cu tur loke a wordo palabra pero Andin Bikker no tabatin reaccion riba e raport aki ya cu e no ta papia malo di Gobierno.

 

Andin Bikker ta bay cumpli 4 luna como flamante number 2 riba lista di partido nobo POR y ta sinta papia di integridad den gobernacion, pero mientras cu e ta sinta cu lema di e partido nobo su tras y ta duna declaracion como “miembro” di POR, Andin Bikker ta sigui presenta su mes como miembro di PDR den Parlamento.

Ora kier papia di integridad, Bikker no por papia di solamente un “pida” integridad, ya cu ta na su lugar pa su persona converti su mes den un miembro di Parlamento independiente loke ta mas na lugar cu e dobel rol cu e ta hungando n’e momentonan aki, segun AVP den un comunicado.

Leave a Reply

Top