Fraccion di AVP: Caminda principal den Sabana Basora ta wordo drecha

 

Awe mainta trempan e bario di Sabana Basora a hay’e cu e grato noticia cu e caminda principal cu ta pasa den Sabana Basora ta bay wordo drecha. Departamento di DOW y companianan BIC y Thiel Corp. cu ta bay drecha e caminda tambe tabata presente.

 

Minister di Infrastructura Oslin Sevinger y tambe Minister Presidente Mike Eman a haci acto di presencia p’asina inaugura e trabaonan. Parlamentario Desiree de Sousa Croes y Clarisca Velasquez cu ta biba den e bario tambe a haci acto di presencia.

Peticion di habitantenan di vecindario a wordo honra y esaki ta muestra di e oido cu Gobierno tin pa su pueblo. E trabaonan lo dura algo mas cu 100 dia y ta pidi for di awor comprension pa e inconveniencia cu e seramento di caminda lo trece cu ne.

 

Habitantenan ta hopi contento cu e caminda aki ta wordo drecha, pasobra e ta den hopi mal estado y cu un caminda ful drecha lo alivia tur hende cu ta trafica den e caminda principal aki den Sabana Basora.

Top