Fraccion di AVP: Nos Polis ta miho organisa y mas efectivo

Crimen ta haci dolor, pero e no ta paga! E hecho aki ta haci cu apesar di cu cada crimen ta causa dolor grandi na e hendenan cu ta wordo afecta y na henter comunidad, a lo largo husticia ta vence. Semper!

 

Den caso di Aruba nos tin e suerte cu inversionnan cu a haci den ultimo ocho aña den husticia y specialmente den Polis, a percura pa awe Aruba tin un cuerpo di Polis cu ta miho organisa y mas efectivo cu nunca antes.

Mas cu 85% di crimennan cu wordo cometi ta wordo soluciona a corto plazo. E motibo ta cu Polis ta tur caminda. Ta bini aserca cu e sosten cu Polis ta haya di pueblo ta birando miho tur dia.

 

Pueblo ta fada cu e crimennan y kier wak tur criminal sera den KIA ta paga pa nan crimen.

E combinacion di mas Polis, Polis miho prepara y ekipa, miho sosten di pueblo y mas enfasis den prevencion, ta duna e resultado aki.

Den e ultimo añanan Polis mes a wordo profesionalisa masha hopi. Tanto e criminalnan cu bini di afo, como esnan di Aruba mes, sa cu nan chensnan pa scapa ta chikito.

Sin embargo nan ta purba nan suerte. Pero cada dia nan suerte ta mas chikito.

 

CRIMEN ORGANISA

E fenomeno di crimen organisa no ta nada nobo. Rond di mundo e ta tuma luga y pa siglonan caba. Na Aruba crimen organisa ta wordo desenmascara mas y mas.

Tanto esnan den crimen organisa pa trafico y benta di droga, como e crimennan organisa pa laba placa y maluza nos sistema financiero. E cantidad di ley cu Parlamento cu AVP den mayoria a trata y aproba den ultimo ocho aña, a percura pa Aruba a sali for di e skina di paisnan cu tabata wordo uza pa labamento di placa.

Asina mes recientemente atrobe e nomber di Aruba a sali den un raport di Merca. Esey ta nifica cu mester sigui renoba nos leynan y mehora e identificacion di transferencia di placa sushi.

 

Mescos ta conta pa otro formanan di crimen organisa. Sea ta pa bende droga aki na Aruba, horta auto, prostitucion, trahadornan ilegal of mercansia ilegal, tur ta daña pa nos pais.

Bon ta cu cada dia Polis y otro organonan di husticia ta miho prepara y ta traha mas estrecho cu organisacionnan internacional, pa identifica y para e criminalnan. Crimen no ta paga.

Mas miho nos Polis ta organisa y ekipa, pa miho nos ta protehi como pais.

Hasta ora criminalnan purba na suerte, nan ta wordo gara, huzga y cera pa paga nan crimennan. Awe nos Polis ta miho organisa y mas efectivo cu nunca antes!

Top