Fraccion di MEP: Dia 18 di maart nos ta celebra nos simbolonan di union y libertad: Himno y Bandera!

Despues cu dia 13 di october 1949 tres miembro di AVP a vota hunto cu Da Costa Gomez di NVP pa e Interim Regeling y cu nan a laga e lucha di e 2147 firmantenan pa Separacion cay, nada, pero net nada mas a sosode riba tereno estatal.

Hecho ta cu despues di 1949 e lidernan di AVP no a papia mas di Separacion, corda pa nan por a lucha y sacrifica pa logra e ideal aki. E tempo ey e lucha di AVP cu nan tabata yama “Lucha Arubano” tabata basa pa gran parti riba un politica discriminatorio caminda nan tabata agita contra tur e hendenan cu a bin for di exterior, mescos cu nan a haci tempo cu nan a busca firma pa peticion pa Separacion, esta e lista di 2147 firmantenan.

 

Segregacion

Esaki siguramente a conduci na segregacion den nos pueblo y cual no a yuda crea un consciensia den un pueblo cu mester ta uni pa logra su idealnan. Ta p’esey historia mes ta mustra cu durante e periodo di 1949-1971 ningun documento, carta, mocion, peticion of encuesta, por ser encontra, corda cu lo por tabatin un referendum, manifestacion of conferencia di mesa rondo caminda AVP lo por a vocifera nan deseo pa Aruba haya su Status Aparte.

Alavez ambos lider di AVP a fayece den e epoca ey, esta Henny Eman na 1957 y Shon A Eman na 1967. Hecho ta cu durante e periodo di 1954 te cu 1967 partido PPA so tabata den Gobierno y nan a traha na amplia e base economico, apesar cu e instrumentonan pa por desaroya nos economia tabata den man di Gobierno di Antiyas.

 

Union y libertad

Dia 9 di februari 1971 a ser funda bao liderazgo di Betico Croes e partido MEP cu su meta principal tabata pa trece husticia social, unda e ser humano ta central y alavez pa trece claridad riba tereno estatal, unda Aruba lo mester ta un pais autonomo den Reino Hulandes.

Pa por logra esaki mester a caba primeramente cu e division y segregacion den pueblo y trece union entre tur esnan cu ta biba riba e pida baranca aki. Na varios ocasion Betico a declara cu tur esnan cu a nace aki y otronan cu a bin Aruba y haci e isla aki nan hogar y cu ta traha y stima e isla aki ta Arubiano. Ta den e cuadro aki dia 16 di maart 1976 nos himno nacional “Aruba dushi tera” y nos bandera a ser acepta den Eilandsraad di Aruba y pa cual partido AVP a vota contra e simbolonan aki di union y libertad. Sin wordo demoralisa pa cu esaki partido MEP a lucha den gobierno insular y Gobierno Central pa e dia di 18 di maart ser reconoci oficialmente como nos Dia Nacional, nos Dia di Himno y Bandera.

 

Politica partidista

Semper desde 1976 nos pueblo a keda celebra e dia aki na grandi, pasobra e himno y bandera no ta di un partido politico, pero di henter e pueblo Arubano. No mester lubida cu AVP desde 1976 nunca a celebra e fecha di 18 di maart, pasobra esaki ta rebiba momentonan amargo den nan historia politico. Tambe nunca nan tabata presente dia 18 di maart na e ceremonia protocolar riba Plaza Libertador Betico Croes, esta e antes yama Plaza Libertad. Hecho ta cu mester a warda te cu 1986 cu AVP a drenta gobierno, pa e ora ey numa nan bin cu nan storia falsifica di 18 maart, ignorando completamente nos simbolonan di himno y bandera. AVP kier converti nos dia oficial di 18 maart den un dia pa haci politica partidista

Sin duda cu e wega politico aki ta rebiba momentonan tristo den historia di nos pueblo, unda cu 2147 persona a vota pa Separacion y nan a ser hinca hunto cu e pueblo den e 12-8 di Antiyas. Finalmente e cadena di 12-8 den apenas 15 aña (1971-1986) a ser rementa for di otro dor di nos inolvidabel lider y estadista Betico Croes.

 

Top