Fraccion di MEP: Hubentud Orguyoso Talentoso (HOT) a bishita Parlamento

Diaranson tabata un dia historico pa Partido MEP pero tambe pa Parlamento di Aruba na unda cu pa prome biaha den historia cu un hala hubenil politico ta bishita Parlamento.

 

Hala hubenil di MEP, HOT, a wordo bon ricibi y atendi pa personal di Griffie durante un recorido den e establecimento di Parlamento.

 

Lider di Partico MEP, sra Evelyn Wever-Croes hunto cu demas Parlamentarionan di MEP a acompaña e hobennan. Cada Parlamentario a splica e contenido di nan trabou como Parlamentario y a encurasha e hobennan pa sigui nan soño si esaki ta pa un dia bira un politico. Y nos no ta descarta cu den futuro un di e hobennan aki lo bin bek den Parlamento como un Minister of Parlamentario di pais Aruba.

 

E hobennan a haya e oportunidad pa sinta den e sala grandi riba stoel di e Parlamentario y Ministernan. Remarcabel tabata ta cu nan ta hopi al tanto kico ta pasa durante reunionnan di Parlamento. Nan a lansa varios pregunta y a vocifera tambe nan inkietudnan pa cu e rumbo di nos pais.

 

Na final di e recorido, sra Evelyn Wever-Croes a gradici e hobennan como tambe personal di Griffie pa e atencion cu nan tabata tin pa nos hobennan. E hobennan di HOT a sali contento cu un pen como recuerdo cu nan a haya regalo di personal di Griffie.

 

Si bo ta un hobennan te cu 35 aña y bo tin e deseo di uni bo mes na HOT, bo por haci esaki door di bay riba pagina di Facebook HOT-MEP y manda nan un mensahe. HOT ta bay p’e cambio. #sinmiedo.

Top