Fraccion di MEP: MEP a bishita Noord den entrada masal

Desde cu MEP a lansa apertura di Campaña 2017, nos candidatonan di Partido ta activo tur dia bishitando cas pa cas den tur bario na Aruba.

Den fin di siman, Lider di Partido MEP hunto cu candidatonan y sostenedornan a drenta den un forma masal den barionan di Noord. Nos a scucha y tuma nota di cada preocupacion cu ta biba den cada hogar.

 

Ciudadanonan di Noord tambe ta pidi pa un cambio. Mayoria ta expresa cu Aruba no ta e Aruba di antes mas unda cu por a biba trankil cu porta y bentana habri. Aruba mester un cambio completo riba e tereno di siguridad y criminalidad. Pa MEP e preocupacion aki lo wordo atendi mesora cu nos ta den Gobierno. Nos lo trece orden y respet bek.

 

Durante di e bishita na Noord varios ciudadano a mustra nan indignacion cu despues di 8 aña ainda e Gobierno di AVP no a construi e HAVO/VWO scol cu Gabinete Oduber a laga tur plan y financiamento cla atras na 2009. Nan ta spera cu esaki wordo realisa asina cu MEP asumi gobernacion despues di september proximo.

 

Noord a ricibi nos den gran forma. Hopi chauffeurnan cu tabata pasa den nan auto a baha for di caminda pa saluda candidatonan y alabes plak sticker riba nan auto.

 

MEP su compromiso cu Aruba ta pa pone e hende central atrobe. Hunto nos lo logra esaki. MEP lo ta drentando tur skina di Aruba cu nos mensahe di cambio. Aruba, hunto p’e cambio!

Top