Fundacion Clinton Whitfield aportando na Sonrisa Aruba

Diasabra ultimo, Fundacion Clinton Whitfield  (FCW) a haci un donacion di varios fan pa plafond na Sonrisa Aruba. Esakinan ta pa reemplasa e fannan cu awor no ta funciona optimalmente mas.

 

FCW a keda estableci dia 3 di juni 2005 pa sra. Mosa Whitfield (d.f.m.) pa honra su defunto esposo sr. Clinton Whitfield.

Pareha Whitfield tabata dos persona hopi conoci riba nos isla. Por corda “Whitfield’s Dress Shop”, mas despues simplemente “Whitfield’s”.

Sr. Clinton Whitfield tabata e iniciador y fundador di “Kiwanis Club Aruba”.

 

Sra. Mosa Whitfield a deposita un suma di placa na banco y interes di e suma aki ta loke ta duna bek na comunidad como donacion na varios organisacion pa medio di Fundacion Clinton Whitfield (FCW).

E aña aki FCW a haci algun donacion caba, e. o. na S.V. Estrella Infantil/Hubenil cu a ricibi bala di futbol pa training y tambe na Unity Carnival Group cu a hiba un grupo di persona cu limitacion den tres parada. Y awor ta toca turno na Sonrisa Aruba.

 

Algun miembro di directiva a ricibi di e Coordinadora di e fundacion, sra. Angelique Perez, un splicacion di e trabou di Sonrisa y Trampolin y un recorido den e edificio.

FCW a keda impresiona p’e programa cu tin diariamente p’e clientenan y tambe pa tur e plannan cu tin pa futuro di e dos centronan aki.

 

Directiva di FCW ta hopi contento por a yuda diferente organisacion riba nos isla cu un donacion di un biaha mas.

 

Directiva di FCW ta consisti di: Sr. Harold Pereira, Presidente; sr. Giantonio Muller, Tesorero; sra. Joyce Pereira, Secretaria; sr. Carlos Albertus, miembro; sra. Daisy Lopez, miembro; sra. Indra Anthony-Pereira, miembro; y sra. Melanie Evans- Kelly, miembro.

Top