Fundacion Lotto pa Deporte a anuncia cu lo inicia cu e trabounan di electricidad y iluminacion na varios compleho deportivo rond Aruba

 

Recientemente St. Fundacion Lotto Pa Deporte, St. Fundacion Facilidadnan Deportivo y e compania Time Line Services NV a tene un reunion riba e ultimo desaroyonan rond di nos complehonan deportivo cu ta cay bou maneho di St. Fundacion Facilidadnan Deportivo, F.F.D.

Meta di e reunion tabata pa evalua e estado di e proyectonan cu ta andando riba e area di electricidad y di e iluminacion den nos complehonan deportivo.

A papia riba e temanan di solucion y drecha e calidad di e lusnnan, tambe e aspecto di presupuesto y cuanto esaki lo costa.

Por ultimo e discuti e temporada cu e compania lo entrega tur e trabounan di reparacion.

 

Mester bisa cu ya caba ta terminando e trabounan di electricidad n’e accomodacion deportivo Jose Wever na Yara, pronto esaki lo ta den funcion.

Lo busca e posibilidad di ilumina rond di e accomodacion p’asina evita e vandalismo cu ultimamente ta azota facilidad deportivo aki.

A inicia tambe cu e preparacionnan nececario pa cuminsa cu e trabounan den e sala di recreacion situa na Centro Deportivo Frans Figaroa na Noord unda lo remplasa e lusnan actual pa un mihor calidad, LED.

 

E trabou mas grandi lo cuminsa dentro di poco n’e parti unda ta practica e deporte di futbol, aki lo drecha e sistema di coriente tur caminda, mientras n’e postenan di lus lo cambia tur e lusnan actual pa lusnan LED.

Na mesun momento lo instala tambe un scoreboard super moderno den e compleho na Noord. Por ultimo a evalua claridad di e lusnan na tur e edificionan den e complehonan di Guillermo Trinidad, Frans Figaroa y Nadi Croes/Crismo Angela, e intencion ta pa remplasa tur e lusnan pa LED, cual ta mucho mas benficioso como tambe duradero y cu ta gasta menos coriente.

 

Lotto su vision y plannan pa aña 2017 ta uno hopi grandi y ya caba a cuminsa traha riba tur esaki, na interes di deporte na Aruba.

Deporte ta pa nos tur, awendia tin necesidad pa motiva tur ciudadano pa aporta na deporte, e ta haci amistad y ta sano pa nos salud.

 

 

 

 

 

 

Top