Fundacion pa Hende Muhe den Dificultad ta presenta su Plan Strategico pa 2017-2022

Awe, 8 di maart, nos ta celebra Dia Internacional di Hende Muhe. Fundacion pa Hende Muhe den Dificultad (FHMD) kier a felicita tur hende muhe y mucha muhe rib’e dia special aki, durante cual ta wordo poni enfoke rib’e hende muhe y e rol importante cu e ta hunga den nos famianan y den nos sociedad.

Pero no solamente rib’e dia aki FHMD ta refleha riba nos hende muhe, sino henter aña.

FHMD ta lucha tur dia pa e hende muhe y su derechonan, pasobra desafortunadamente hopi di nos hende muhenan y nos mucha muhenan ta haya nan diariamente confronta cu violencia domestico.

 

Ultimo tempo nos por ripara cu mas atencion ta wordo duna na e problematica serio aki di nos sociedad. Via di medionan di comunicacion, mas y mas e casonan di violencia domestico ta keda raporta y nos tin speransa cu, mirando e conmocion y reaccion cu esakinan a trece den nos comunidad, esaki ta un señal cu Aruba ta cla pa uni cu FHMD pa combati violencia domestico y e efectonan negativo cu esaki ta trece pa nos hende muhenan y muchanan y consecuentemente tambe pa henter nos comunidad.

 

FHMD a tuma e fecha special aki como deadline pa finalisa nan Plan Strategico pa e fundacion pa 2017-2022. Den e Plan Strategico aki FHMD ta haci un evaluacion di nan trabaonan y logronan durante e ultimo 21 añanan y nan ta delinea nan plannan pa futuro, specificamente pa e proximo 5 añanan.

E intencion di FHMD ta pa modernisa y amplia nan servicionan pa por sigui sirbi nan clientenan optimalmente. Esaki lo encera e. o. bijscholing di nan personal, recruitment di personal profesional adicional, upgrading di e shelter, intensificacion di nan programanan di conscientisacion, colaboracion mas estrecho cu instancianan concerni na Aruba y den exterior, fundraising extenso pa recauda e fondonan necesario pa por brinda un servicio di calidad halto y trabaonan di advocacia pa cu Gobierno encuanto leynan y convenionan international cu mester wordo implementa na Aruba pa combati violencia domestico.

 

FHMD ta super orguyoso di nan team dinamico, tanto na nan oficina y nan shelter, como den bestuur, cu ta traha incansabelmente pa e causa importante aki y nos ta sigur cu, cu ayudo di e pueblo Arubano, Gobierno y tur instancia concerni, nos por logra tur e metanan ambisioso cu nos a pone nos dilanti pa e proximo aña. Nos ta gradici tur compania, instancia y persona cu di un manera of otro ta duna nan sosten na nos fundacion y nos ta spera di por keda conta rib’e sosten di un y tur na Aruba pa nos hunto por caba cu e problema aki riba nos isla. Feliz dia di Hende Muhe!

Top