Fundacion Pa Nos Muchanan ta presenta tayer: “Traha un Budget efectivo pa bo Centro di Cuido”

Centronan di Cuido y Guia di Mucha tin un trabou hopi importante den nos comunidad.

E trabou cu nan ta eherce ta uno responsabel, delicado y bunita unda ta brinda servicio di cuido y guia di nos muchanan. Hunto cu e responsabilidad aki ta bin un otro aspecto importante cual ta e budget di e Centro. Esaki ta e motor pa funcionamento fiho di e Centro.

Tin diferente gasto cu mester wordo haci semanalmente y/of mensualmente, e. o. compra di cuminda, pampers, awa, electricidad, salario di trahadornan, huur/hypoteca etc.

 

Banda di gastonan fiho, ta importante pa spaar un suma tur luna, por si acaso un situacion presenta unda mester cumpra of drecha algo den e Centro.

Tambe, hopi Centro conoce e asina yama “low season” unda cu muchanan cu ta bay cuminsa Scol Preparatorio ta stop di bay e Centro. Esaki ta pone cu entre juni y juli e entrada por bira menos, pero esaki no mester ta un reto. Tin diferente manera pa tene un entrada fiho hasta den lunanan cu tin menos cliente.

 

Centronan existente, pero tambe personanan cu ta bay lanta nan mes un Centro por tin diferente pregunta ora ta trata e situacion financiero di e Centro.

Kisas bo kier sa si e budget actual cu bo tin ta ok? Of si bo mester ahusta algo? Kisas bo kier haya tips pa mantene un entrada fiho hasta den e lunanan cu tin menos mucha?

Asina por tin diferente pregunta mas. Pa e motibonan aki, Fundacion Pa Nos Muchanan (FPNM) ta organisa un tayer “Traha un Budget efectivo pa bo Centro di Cuido” pa eleva conocemento rib’e topico.

 

Lo trata e topiconan manera, Con pa traha un budget (presupuesto) efectivo; E miho structura/format pa uza ora di traha un budget; Loke mester ta para den bo budget; Calcula pago mensual pa cada mucha; Con bo ta calcula ganashi pa lunanan cu tin menos mucha; Loke mester tene cuenta cu ne – Formanan huridico… y hopi mas!

E tayer aki ta programa pa dia 11 di maart. Fecha: Diasabra 11 di maart 2017. Orario: 9:00am –1:00pm. Cuponan ta limita

Pa mas informacion y inscripcion, tuma contacto cu nos na: 588-0856/583-4247 of pasa cerca nos na: Cumana #2 (Fundacion Pa Nos Muchanan).

Top