Fundacion pa Talento Musical Donny Laclé a experencia un abuso di confiansa di Partido MAS

Fundacion pa Talento Musical Donny Laclé, pa medio di e articulo aki, kier reacciona riba un articulo cu a sali den diferente medio di comunicacion, unda Partido MAS ta gaba cu nan a haci un donacion na Funari, un fundacion cu ta traha na beneficio di hendenan cu no por cana (bon) y ta sinta den un rolstoel.
PERO… loke MAS no ta skirbi ta cu e donacion aki a tuma luga dia 30 di april.
Y tampoco ta menciona na unda. Pakico no a hacie n’e pasadia of oficina di Funari na Savaneta?

No, e dos miembronan di MAS, dr. Lampe y Holmo Henriquez, ta bin Concierto Dominical Donny Laclé, na Biblioteca na Playa, como si fuera, mescos cu tur otro, nan ta bin disfruta di e ambiente musical di e mainta aki, na unda Funari Bula Fuse a presenta como prome grupo musical.
Y ora e ultimo grupo tabata haci nan presentacion, sin cu e organisadornan sa di nada, scondi, patras, unda nan a kere niun hende ta mira nan, nan ta comete e abuso di confiansa aki, (entrega e donacion), pasobra otro palabra nos no tin p’e acto traicionero aki contra e organisadornan, e musiconan y e bishitantenan.
Y si bo ta haci algo scondi, ta pasobra bo sa cu bo ta haci algo malo!

Y ademas bo ta pone un mancha rib’e concierto aki di tur fin di luna.
Pasobra e conciertonan aki NO tin color politico! E conciertonan mensual aki cu ta tumando luga pa mas di 17 aña, unda entrada ta gratis, tur musico ta toca y canta gratis y solamente ta pidi un donacion di esnan presente, pa por yuda diferente hoben talento musical financieramente pa nan por sigui desaroya nan talento musical.

Den un combersacion, via telefon, cu un di e organisadornan di e concierto a hiba cu sr. Henriquez, despues di 30 di april, el a purba laba man y a declara cu e potretnan cu nan a saca di e donacion ta pa uzo interno y lo no bin den medionan di publicidad.
Wel, e no tin palabra di homber, no a tene su mes na loke el a bisa y a publica e potretnan toch despues di casi dos luna. Wel, pa e miembronan di e Fundacion te ainda e maluzo di nan concierto dor di partido MAS ta haci dolor.

Top