Fundacion Sea Bunita Sea Bo Mes: Loke inclusion ta nifica pa nos hendenan cu Down Syndrome

Riba dia mundial di Down Syndrome nos kier haci uzo di e oportunidad aki pa reflexiona rib’e derecho di nos hendenan cu Down Syndrome, y si berdaderamente nos ta cumpli cu e derecho cu nan tin, of mester tin.

Cu otro palabra si inconscientemente nos lo ta violando nan derecho como ser humano y loke nos ta referi na dj’e, ta e derecho di “Inclusion”. P. e. den e ultimo temponan aki nos por a lesa, hasta scucha cu mester traha mas riba inclusion di nos hendenan cu Down Syndrome riba tur nivel den nos sociedad! Pero e pregunta clave ta, si esnan concerni ta compronde loke “Inclusion” ta encera? Loke nos a constata ta, cu nan ta bisa cu mester bin mas inclusion den nos sociedad, pero den accion tin mas “segragacion” cual ta nifica cu esnan concerni no ta compronde loke “inclusion” ta encera!

 

Ora cu nos ta referi na “inclusion” di nos hendenan cu Down Syndrome den nos sociedad, esaki mester cuminsa den nos sistema di enseñansa; caminda muchanan cu Down Syndrome mester por ricibi nan educacion hunto cu muchanan regular cu no tin limitacion, cuminsando for di Peuter School te cu e nivel mas halto den nos enseñansa.

Esaki lo yuda desaroya e studiantenan cu Down Syndrome di tal manera cu e docentenan por descubri nan abilidad y talentonan, cual mayan y den futuro por forma nos hendenan cu Down Syndrome den adultonan cu por forma parti di nos mercado laboral sea como un empleado profesional, of doño di nan propio negoshi. Cu otro palabra nos hendenan cu Down Syndrome tin e oportunidad di forma parti di e desaroyo igual den nos sociedad.

 

Inclusion den nos sociedad cuminsando den nos sistema di enseñansa lo preveni “Bullying y descriminacion” y crea mas compacion, comprension y inclusion den nos sociedad cual al final mester ta e meta, pa nos por tin un sociedad progresivo!

 

Por constata tambe cu gran parti di esnan cu Down Syndrome tin dificultad pa forma parti di nos mercado laboral, sea debi cu nan ta diferente of nan abilidad ta limita. Esaki por wordo evita si tabatin for di cuminsamento e formacion di inclusion hinca den nos sistema di enseñansa y den nos mercado laboral.

Ademas por constata cu aceso na servicio di cuido ora cunan yega e edad di adulto of edad mas avansa ta bira dificil of hasta imposibel. Si tene cuenta cu tur e aspectonan aki, mester admiti cu tin falta di inclusion den bida di esnan cu Down Syndrome y e mensahe mester ta cu nos como comunidad mester realisa y acepta cu “Inclusion general” di nos hendenan cu Down Syndrome lo kibra tur barera cu ta stroba e desaroyo den nan bida.

 

Pa e motibo aki nos ta haci un apelacion na tur instancia concerni rib’e dia mundial di Down Syndrome pa reflexiona rib’e bida di esnan cu Down Syndrome y ban sostene cualkier iniciativa cu lo por garantisa “Inclusion general” den nos sistema di enseñansa, laboral, deporte, salud y cuido cu ta igual cu tur hende regular cu no tin limitacion.

 

E ta un hecho cu mundialmente nan ta luchando pa inclusion di nos muchanan cu Down Syndrome riba tur nivel di enseñansa igual cu muchanan regular sin limitacion, paso a keda comproba cu “incorporacion” a resulta miho pa hopi individual den nos sociedad, eliminando descriminacion, bullying y creando di e manera aki un miho sociedad.

Top