Gabinete consecutivo no a cumpli cu nan propio intencion- y palabracionnan

SDBA ta constata falta di capacidad y boluntad di Gobierno pa mehora administracion financiero deficiente

 

For di e raport di Fundacion Gobernacion di Calidad Aruba (FGCA) ta sali na cla cu pa diferente Gabinete pa hopi tempo tabata cla cu tabatin un situacion financiero serio. Sinembargo, tur nan intencionnan pa mehoracion a caba na nada.

Al contrario, e situacion a sigui empeora. E maneho politico no solamente a afecta finanza publico na un manera serio, pero tambe di e fondonan social.

Redoblacion di e pensioen casi a hiba na bancarota di SVB. Esey solamente por a evita dor di subi edad di pensioen.

E debenan enorme a hiba na obligacion di interes y di pago di debe hopi substancial cu lo sigui durante e decadanan benidero. Esey ta haci inversion di Gobierno necesario na Aruba practicamente imposibel.

 

Ya caba na aña 1993 e situacion financiero tabata asina malo cu Gobierno (di MEP) di e tempo ey a haci un apelacion na Gobierno di Hulanda pa duna asistencia financiero. E condicionnan (entre otro mehoracion di e administracion financiero cu hustamente a causa hopi di e problemanan!) a resulata di ta un obstaculo mucho halto pa ambos partido grandi.

E siguiente Gobierno (di AVP) a instala e grupo di trabou ‘Gobernacion di Calidad’ cu mester a bin cu recomendacion pa mehora concretamente e calidad di gobernacion (e.o. di e administracion financiero!).

Apesar cu e grupo di trabou a cumpli den poco tempo cu su tarea (Raport Calidad), ehecucion concreto di e recomendacionnan tambe a resulta di ta un paso mucho grandi p’e Gobierno(nan).

 

Siguientemente e gobernacion nobo (di MEP) a instala Comision Financiero, sigui algun aña despues p’e National Commission on Public Finance. E ultimo aki a calcula na 2006 cu si tuma algun ‘medida’ (e.o., limita nombramento nobo di personal), dentro di 3 aña lo por logra un surplus riba presupuesto di Afl. 25 miyon.

Sinembargo, e maneho di Gobierno ‘segun propio pensamento’ a conduci na un fayo presupuestal di Afl. 150,- miyon, locual a empeora e situacion di debe hopi mas ainda.  Ya caba poco despues cu a anuncia nan, a viola tanto e maneho di economisacion ‘Disciplina y curashi’ (cu e ‘norma Oduber-Swaen’ conoci), como e Acuerdo di Presupuesto Balancea di e siguiente Gabinete di Mike Eman.

Consecuentemente e fayonan presupuestal y e debenan a sali mas ainda for di man. Durante decada esakinan tabatin consecuencia serio pa balance di pago, nivel di interes, inversion particular, atraso di pago y inversion di Gobierno.

 

Maneho di gobierno a chica e fondonan social

E Gobiernonan consecutivo di Aruba di e dos colornan politico principal a ocasiona hopi daño na e fondo di pensioen mas importante di Aruba. Esaki ta hopi mas grandi cu perdida di e tan famoso ‘regalo’ reciente di Afl. 60 miyon di parti di SVB pa Gobierno di Aruba.

Gabinete consecutivo, pa motibo electoral, continuamente a afecta e principionan principal di e cuido di behes.

Den esey nan a neglisha e tantisimo advertencianan di parti di instancia importante manera SVB mes y ILO. Al fin y al cabo ta resulta cu por atribui e casi-bancarota di e fondo di SVB y e aumento di e edad di pensioen reciente casi exclusivamente n’e ‘accionnan popular’ di e Gobiernonan poco prome cu eleccion. Esakinan tabatin consecuencia serio p’e fondo.

En realidad e supuesto mehoracion pa pensionado riba termino corto, al fin y al cabo tabatin consecuencia negativo serio p’e riba termino largo (maneho di lollypop).

 

Specialmente e asina yama redoblacion di pensioen pa Gobierno di AVP na 1994 casi a nifica fin di e fondo. Como consecuencia e reserva di mas di Afl. 350 miyon dentro di apenas algun aña a caba te na 0.

Tambe ‘maneho’ di Gobierno a afecta e situacion finaciero di APFA negativamente como cu Gobierno pa hopi aña no a cumpli cu su obligacion legal di paga e premienan.

Consecuentemente APFA no por a inverti suficiente, locual a reduci e rendimiento. Na 1999 Gobierno (di AVP) a tuma e iniciativa pa investiga un structura nobo di APFA cu un posibel aumento di edad di pensioen.

E investigacion aki a uza un metodo nobo di e interes calcula, esta un percentahe di interes fictisio pa rendimento den futuro.

 

Pa Gobierno esaki a nifica na aña 2001 cu su ‘obligacionnan’ (su debenan!) a baha cu Afl. 247 miyon. Pa APFA esaki a nifica un reduccion di balor di su capital cu Afl. 247 miyon, mientras cu a hala e problemanan mas pa futuro.

Na mesun manera, consideracion electoral tabata motibo cu Gobierno (di AVP) a crea AZV na 2001 segun e principio di ‘The-sky-is-the-limit’. Pesey tambe for di un principio e gastonan tabata incontrolable y por a malversa riba escala grandi.

Gobierno no a tene su mes n’e aporte cu el a priminti p’e fondo di AZV. Como tal el a cuminsa cu un fayo di miyones cu nunca mas por a compensa.

 

DEBE Y MAS DEBE

Ya caba durente añanan ’90 di siglo pasa e Commissie Schuldenproblematiek (Comision di Problematica di Debe) a adverti cu “conciencia politico mester cuminsa realisa su mes cu no por neglisha sin ser castiga e normanan pa comportamento economico drechi. Debe di Gobierno ta resultado di fayo presupuestal of pago di gasto ‘no-autorisa’). Consecuentemente, control di debe no ta posibel sin disciplina presupuestario”.

 

Pero e partidonan politico tampoco a scucha e ‘conseho’ logico aki di ningun manera. Pesey tambe Conseho Consultativo (RvA) ta expresa su preocupacion den su comentario tocante e presupuesto (di Gobierno di MEP) na 2005 (!) cu e gastonan di interes  a aumenta casi 25% compara cu 2004. Y pio ainda: “Den e ultimo 5 añanan e gastonan di interes hasta a redobla. E gastonan di interes ta un bon indicacion di e debenan di Gobierno.

Pesey RvA ta duna e recomendacion serio pa duna hopi prioridad na restructuracion di e debe nacional. Si e gastonan di interes sigui subi, esaki lo nifica un presion fuerte riba finansa publico locual lo limita seriamente e espacio pa maneho den futuro”.

E hecho cu e debe di Aruba a redobla e ultimo añanan bou di maneho di Gobierno di AVP ta un prueba cu tampoco a haci nada cu e conseho aki.

E gastonan di interes mientras tanto ta incargabel. Por paga e debenan solamente pa medio di creacion di otro debe. P’e 22 añanan benidero e skema di pago di debe ta lo siguiente:

 

Pago di debe di Aruba 2017-2039

# JAAR AFLOSSING AFL. # JAAR AFLOSSING AFL.
1 2017 414,252,156.25 13 2029 77,514,337.58
2 2018 337,910,454.58 14 2030 38,083,257.94
3 2019 376,420,867.87 15 2031 9,410,691.49
4 2020 322,149,704.59 16 2032 10,049,304.08
5 2021 391,051,687.28 17 2033 10,731,207.89
6 2022 295,253,115.05 18 2034 11,390,522.33
7 2023 253,740,614.49 19 2035 31,703,321.92
8 2024 271,006,765.44 20 2036 12,930,672.48
9 2025 300,428,006.96 21 2037 13,820,535.34
10 2026 340,222,814.04 22 2038 14,771,884.37
11 2027 82,973,297.83 23 2039 15,789,321.70
12 2028 208,210,650.37   TOTAAL 4.161.152.514,50

Fuente: Directie Financiën

Esakinan no ta inclui e pagonan p’e proyectonan di PPP y ‘otro obligacion cu no ta figura riba presupuesto’.

Mester tene na cuenta cu locual ta fia awor pa paga e debe di Afl. 414 miyon, na 2017, lo acumula cu e otro debenan mas chikito for di aña 2029. Esey ta conta pa tur e otro ‘pagonan’ benidero. Pues e problema lo sigui empeora den caso cu no bin cu un cambio drastico di e maneho financiero.

E obligacionnan di pago anual p’e proyectonan di PPP

Pago pa e 4 proyectonan PPP* 2017 2018 2019** 2020
Gasto total ‘off-balance’ na Afl. 36.592.500 50.598.096 64.829.346 64.829.346
Gasto total di proyecto PPP como % di e sector colectivo total 1,4% 2,0% 2,5% 2,5%

*Proyecto PPP: Green corridor, Watty Vos Boulevard, Dr. Horacio Oduber Hospitaal, Infra-gebouw D.O.W.  NO ta inclui e gastonan di e 4 Acomodacionnan MultiFunctional(MFA)!

** Aruba mester paga e suma aki minimal e 20 añanan despues…

 

Como cu mester paga e debenan ‘bieu’ pa medio di debe ‘nobo’, e ‘obligacionnan di pago’ lo sigiui aumenta den curso di aña.

Segun FGCA, al fin y al cabo, ta nos yiu- y nietonan lo mester paga nan. En realidad ta nan ta carga e peso di e mentalidad di ‘no worry’ di nos generacion!

 

Top