Gabinete Mike Eman a tuma despedida di Gobernador Fredis Refunjol

Diamars merdia henter Conseho di Minister di Gabinete Mike Eman II a realisa un encuentro cu Gobernador Fredis Refunjol na Cas di Gobernador.

E ocasion a sirbi como reunion caminda a repasa e desaroyonan nacional durante ultimo añanan, pero tambe pa gradici y rindi honor n’e funcionario mas halto di Gobierno di Aruba.

 

“Hopi biaha Gobernador a fungi como consehero y guia pa nos. Nos Ministernan a expresa nan gratitud p’e sosten,pero tambe p’e amistad cu a crea na caminda,” asina Prome MInister Mike Eman a declara na su salida for di reunion special.

Sin duda algun, Gabinete Mike Eman I y II a comparti momentonan grandi den Reino cu sr. Fredis Refunjol como Gobernador.

Tabatin, p.e. e bishitanan Real, pero tambe e momentonan di tension manera discusion riba presupuesto.

 

Durante e encuentro di diamars a papia riba esakinan y riba e papel importante cu cada un mester a asumi pa supera e diferencia di opinion y yega bek na union y respeto mutuo.

Premier Eman y su Gabinete ta felicita Gobernador Refunjol tambe cu e condecoracion halto cu el a ricibi recientemente di Cas Real riba peticion di Gobierno y pueblo di Aruba.

Esaki no por tabata otro, ya cu den Gabinete Mike Eman ta biba awe un emocion di a traha hunto cu un persona cu un trayectoria largo.

 

“Saludo y brindis grandi na honor di Gobernador cu deseo pa Creador por guia y dun’e tur felicidad mey mey di su casa, yiu y nietonan; p’e por disfruta despues di a dedica su bida na pueblo di Aruba como maestro di scol, Parlamentario, Minister y ultimo como Gobernador,” tabata e palabra di Prome Minister Eman.

 

Adicionalmente, lider di Gobierno a enfatisa cu “Gobernador a hunga un papel hopi central pa Gabinete Mike Eman I y II. Awe nos ta expresa palabra di hopi gratitud, brasa fuerte y te hasta lagrima, despues di a pasa den circumstancianan fuerte, pero basa riba respet y amistad, a sa di supera e momentonan ey pa sigui traha na bienestar di nos pais.”

 

Top